काठमाडौं । महिला विश्वकप फुटबलको उपाधि अमेरिकाले कब्जा गरेको छ । गएराती सम्पन्न खेलमा नेदरल्यान्ड्सलाई २९० गोल अन्तरले पराजित गर्दै अमेरिकाले महिला विश्वकप फुटबलको उपाधि चुम्न सफल भएको हो । फ्रान्समा सम्पन्न विश्वकपको उपाधि अमेरिकालाई दिलाउन मेगान रापिनोई र रोज लाभिल्लीले गोल गरेर अमेरिकाले उपाधि आफ्नो हातमा पारेको हो ।

पहिलो हाफसम्म बराबरीमा रोकिएको अमेरिकाले दोस्रो हाफमा उत्कृष्ट प्रदर्शन गर्दै शानदार २ गोल गर्न सफल भएको हो । तुलनात्मक रुपमा पहिलो हाफभन्दा दोस्रो हाफमा अमेरिकाविरुद्ध निरिह देखिएको नेदरल्यान्ड्सले विश्वकपको उपाधि जित्ने राम्रो अवसर पाए पनि अवसरको सदुपयोग गर्न नसक्दा लज्जास्पद हार बेहोर्न बाध्य भएको हो ।

काठमाडौँ, १८ वैशाख : अखिल नेपाल फुटबल सङ्घ (एन्फा) ले एन्फा एकेडेमीका लागि ८१ जना उमेर समूहका खेलाडी छनोट गरेको छ ।एन्फा कम्प्लेक्स सातदोबाटोमा आज बिहान सम्पन्न छनोटबाट एन्फाले मेडिकल परीक्षणका लागि ८१ जना यू–१३ उमेर समूहका खेलाडी छनोट गरेको हो । मुलुकभरबाट छानिएर आएका खेलाडीबीच वैशाख १२ देखि अन्तिम चरणको छनोट गर्दै एन्फाले ८१ खेलाडी छानेको सूची तयार पारेको हो ।

एन्फाले छनोट भएका ८१ खेलाडीको मेडिकल परीक्षण गर्नेछ । मेडिकलपछि एन्फाले एकेडेमीका लागि ५० जना खेलाडी छनोट गर्नेछ । छनोट भएका खेलाडीलाई एन्फाले बुटवल र धरानको एकेडेमी राखेर पढाइका साथै फुटबल प्रशिक्षण दिने एन्फा प्रवक्ता किरण राईले जानकारी दिनुभयो । यस्तै यसै छनोटबाट आएका यू–१६ खेलाडीले एशियाली फुटबल महासङ्घ (एएफसी) यू–१६ छनोटमा नेपालको प्रतिनिधित्व गर्ने एन्फाले जनाएको छ ।छनोट हुने खेलाडीमा विक्रम गौतम, विजय राज शाही, विश्वास ओझा, दीपक थापामगर, विपिन थापा, अनिल खड्का, अजय लामा, मनोज खुलाल, सुमन भेटवाल, रोनिक रानामगर, सुजल घलेलगायत ८१ जना रहेका छन् । (रासस)

काठमाडौँ, १८ वैशाख : ‘ए’ डिभिजन क्लब सरस्वती युवा क्लब दोस्रो संस्करणको चन्द्रागिरी गोल्डकप फुटबल प्रतियोगिता सेमिफाइनलमा प्रवेश गरेको छ । चन्द्रागिरी नैकापस्थित नैकाप फुटबल मैदानमा मङ्गलबार दिउँसो भएको तेस्रो क्वार्टरफाइनल खेलमा सरस्वती आयोजक दीपशिखा युवा समूहलाई २–० ले पराजित सेमिफाइनमा पुग्न सफल भएको हो । सरस्वतीको जितमा सुजित बुढाथोकी र सञ्जीव लामाले एक÷एक गोल गरे ।

खेलको ३६औँ मिनेटमा सुजित बुढाथोकीले गोल गर्दै सरस्वतीलाई पहिलो हाफमा १–० को अग्रता दिलाए भने खेलको ७७औँ मिनेटमा सञ्जीव लामाले गोल गर्दै सरस्वतीलाई २–० को जित दिलाएका थिए । सरस्वतीका सुजित बुढाथोकी खेलको म्यान अफ दि म्याच घोषित भए । वैशाख १५ देखि शुरु भएको प्रतियोगितामा आयोजकसहित आठ समूहको सहभागिता रहेको छ । फाइनल खेल भने वैशाख २२ गते हुने आयोजक दीपशिखा युवा क्लबले जनाएको छ । (रासस)

अछाम, १७ वैशाख ; पूर्व उपप्रधानमन्त्री भीमबहादुर रावलले व्यक्ति शिक्षित भएपछि मात्रै समुन्नत समाज निर्माण हुने बताउनुभएको छ ।नेकपाको सुदूरपश्चिम इञ्चार्जसमेत रहनुभएका नेता रावलले मङ्गलसेन नगरपालिकाले आयोजना गरेको दोस्रो मेयरकप भलिबल प्रतियोगिताको उद्घाटन गर्दै खेलकूदले शारीरिक, मानसिक रुपमा फाइदा हुने धारणा व्यक्त गर्नुभयो । कार्यक्रमकै अवसरमा षोडशादेबी मावि मङ्गलसेनले राखेको मागपत्र बुझ्दै रावलले विद्यालयको छात्रावास र भवन निर्माणका लागि आवश्यक पहल गर्ने आश्वासन दिनुभयो ।

राष्ट्रियसभा सदस्य शेरबहादुर कुँवरले खेलले राष्ट्रलाई चिनाउने भएकाले खेल सबैका लागि आवश्यक रहेको औंल्याउँदै विकास, प्रगती र उन्नति पनि खेल क्षेत्रबाट सम्भव रहेको बताउनुभयो । कार्यक्रममा मङ्गलसेन नगरपालिका– ३ निवासी पूर्व प्रहरी निरीक्षक भरतबहादुर बोगटीले आफ्ना स्वर्गीय बुबा गोरखबहादुर, आमा जयन्तीदेवी, दाजु नवलसिंह र सर्जन बोगटीको सम्झनामा षोडशा माविमा रु ५० हजारको गोजन्स स्मृति अक्षयकोष स्थापना गर्नुभयो । अक्षयकोषबाट २०७५ मा विद्यालयमा सर्वोत्कृष्ट नतिजा ल्याउने छात्र ज्ञानेन्द्र केसी र छात्रा चाँदनी बोगटीलाई नगद पुरस्कार प्रदान गरिएको थियो । यस्तै षोडशा भूतपूर्व विद्यार्थी समाजले निकालेको भित्तेपात्रोको विमोचन समेत गरिएको थियो । (रासस)

काभ्रेपलाञ्चोक, १७ वैशाख : बनेपा ब्वाइज् क्लब (बिबिसी)को आयोजनामा यही वैशाख २० गतेदेखि बनेपामा ‘बिबिसी कप नाइन ए साइड खुल्ला फुटबल प्रतियोगिता’ आयोजना गरिएको छ । बनेपामा आज पत्रकार सम्मेलन गरी नकआउटका आधारमा सञ्चालन हुने प्रतियोगितामा ३६ टिमले सहभागिता जनाएको आयोजक क्लबका अध्यक्ष महेश कर्माचार्यले जानकारी दिनुभयो । उहाँका अनुसार आउँदो जेठ २ गतेसम्म बनेपास्थित बहुप्राविधिक शिक्षालयको खेल मैदानमा सञ्चालन हुने प्रतियोगितामा काभ्रेपलाञ्चोको १८ तथा भक्तपुर, ललितपुर र काठमाडाँैका १७ वटा टिमले प्रतिस्पर्धा गर्नेछन् ।

प्रतियोगिताको विजेता टिमलाई दुई लाख र उपविजेता टिमलाई रु एक लाख पुरस्कार दिइने आयोजकले जनाएका छन् । प्रतियोगितामा हरेक खेलका म्यान अफ दी म्याच, उत्कृष्ट हुने गोलकिपर, रक्षक, मिडफिल्ड, फरवार्ड, सर्वाधिक गोलकर्ता र प्रतिरक्षकलाई समेत पुरस्कृत गरिनेछ । (रासस)

बेझाड, १६ वैशाख : दोस्रो माथागढी फुटबल कपको उपाधि रामपुर फुटबल क्लबले हात पार्न सफल भएको छ । उक्त क्लबले रु एक लाख सात हजारका साथै पदक तथा प्रमाण पत्र प्राप्त गरेको हो । प्रतियोगितामा उपविजेता डाँडाडुम युवा क्लबले रु ५२ हजार प्राप्त गरेको छ । पाँच नं प्रदेशसभा सदस्य वीरबहादुर रानाले पुरस्कार वितरण गर्दै खेल क्षेत्रको विकासका लागि प्रदेश सरकारले विशेष योजना र कार्यक्रम ल्याएको बताउनुभयो ।गाउँपालिका अध्यक्ष सन्तोष थापामगरले खेलको विकास गर्न विशेष प्राथमिकता दिइएको बताउनुभयो । माथागढी गाउँपालिकाको आर्थिक सहयोग तथा सराई युवा क्लबको आयोजना खेल सञ्चालन भएको हो । प्रतियोगितामा ११ समूहको सहभागिता थियो ।  (रासस)

काठमाडौँ १६ वैशाख : सिटिजन्स बैंक इन्टरनेशनल लिमिटेडको मुख्य प्रायोजन तथा काठमाडौँ जिल्ला टेनिस सङ्घको आयोजनामा साताँै खुला टेनिस प्रतियोगिता आजदेखि यहाँ शुरु भएको छ । सो प्रतियोगिताको राष्ट्रिय खेलकूद परिषद्का सदस्य सचिव केशवकुमार विष्टले उद्घाटन गर्नुभयो । प्रतियोगिताका खेल त्रिपुरेश्वरस्थित राष्ट्रिय खेलकूद परिषद् तथा भद्रकालीस्थित आर्मी अफिसर्स क्लबको कोर्टमा हुने सङ्घका अध्यक्ष मनोहरदास मुलले जानकारी दिनुभयो । प्रतियोगितामा १३८ खेलाडीले प्रतिस्पर्धा गर्नेछन् । पुरुष÷महिला सिङ्गल्स, मिक्स डबल्स र विभिन्न उमेर समूहको भेट्रान स्पर्धासहित १० स्पर्धामा खेल हुनेछ । प्रतियोगिताको पुरस्कार राशि रु चार लाख ९८ हजार ५०० छ । प्रतियोगिता वैशाखा २१ गतेसम्म सञ्चालन हुनेछ । (रासस)

काठमाडौँ, १६ वैशाख : नेपाल हाप्किडो सङ्घका अध्यक्ष कालीबहादुर घर्तीमगरले ‘इन्टरनेसनल हाप्किडो मास्टर्स अफ दि एयर–२०१९’ अवार्ड पाउनुभएको छ ।जर्मनीको म्युनिखमा आइतबार राति भएको कार्यक्रममा सेल्फ डिफेन्स जर्मनी फेडरेसनले मगरलाई सो अवार्ड प्रदान गरेको राष्ट्रिय खेलकूद परिषद् (राखेप)ले जनाएको छ ।नेपाल मार्सल आर्ट्स हाप्किडो सङ्घको दोस्रो कार्यकालका लागि २०७४ सालमा मगर पुनः निर्वाचित हुनुभएको थियो । अवार्ड प्राप्त गरेपछि मगरले पदक सबै नेपाली र मार्सल आर्टका खेलाडीको लागि गौरवको विषय भएको प्रतिक्रिया दिनुभयो ।  (रासस)

काठमाडौँ । लिभरपुलका मुख्य डिफेन्डर भान बर्षको उत्कृष्ट खेलाडी बन्न सफल भएका छन् । लिभरपुलका मुख्य डिफेन्डर भान ब्यवसायिक फुटबल संघले प्रदान गरेको बर्षको उत्कृष्ट खेलाडी बन्दा बर्षको उत्कृष्ट युवा खेलाडी म्यानचेस्टर सिटीका रहिम स्ट्रलिङले आफ्नो कब्जामा लिन सफल भएका छन् ।

लामो समयपछि डिफेन्डरले यो उपाधि जितेको भन्दै भानको चौतर्फी चर्चा सुरु भएको छ । भानले सिटीबाट मनोनयनमा परेका ६ खेलाडीलाई पछि पार्दै उपाधि हात पारे । सन् २००५ मा जोन टेरीले यो उपाधि जितेपछि कुनैपनि डिफेन्डरले हात पार्न नसकेका बेला उनले कमाल गरेर दुनियालाई देखाइदिउका छन् ।

रहिमसँगै साडीयो माने, सर्जियो अगुइरो, बेर्नान्डो सिल्भालाई पछि पार्दै भानले चर्चा कमाइरहँदा वर्षको उत्कृष्ट महिला खेलाडीको अवार्ड भिभिनी मेइड्माले हात पार्न सफल भएकी छिन् ।

विदुर, १५ वैशाख : नुवाकोटको बट्टारस्थित खेलमैदानमा राष्ट्रियस्तरको अन्तर नगरपालिका मेयरकप फुटबल प्रतियोगिता हुने भएको छ ।विदुर नगरपालिकाको आयोजना तथा जिल्ला फुटबल सङ्घ नुवाकोटको प्राविधिक सहयोगमा सञ्चालन हुने प्रतियोगितामा सातै प्रदेशभित्रका महानगर, उपमहानगर र नगरपालिकालाई पत्राचार गरिएको छ । देशभरिका १० टिमलाई सहभागी गराउने उद्देश्य रहेको एन्फा उपाध्यक्ष उद्वव पनेरुले बताउनुभयो ।

पनेरुका अनुसार वैशाख १८ गतेदेखि शुरु हुने प्रतियोगितामा प्रथम हुने टिमलाई नगद रु तीन लाख, शिल्ड र प्रमाणपत्र वितरण गरिनेछ । त्यसैगरी द्वितीय हुने टिमलाई रु एक लाख ५० हजार नगद, शिल्ड र प्रमाणपत्र वितरण गरिनेछ । प्रतियोगिता नकआउट आधारमा खेलाइने एन्फाका केन्द्रीय सदस्य पूर्णमान चित्रकारले बताउनुभयो ।जिल्लामा खेलकूदको विकासमा अग्रसर बन्दै नगरपालिकाभित्रका प्रत्येक वडामा खेलकूद मैदान बनाउने लक्ष्यका साथ बजेट विनियोजन गरिने विदुर नगरपालिकाका प्रमुख सञ्जु पण्डितले बताउनुभयो ।  (रासस)

सुर्खेत, १५ वैशाख : वीरेन्द्रनगरमा जारी दोस्रो संस्करणको कर्णाली प्रिमियर लिग (केपिएल) मा मध्यपश्चिम क्रिकेट क्लबले पहिलो जीत दर्ता गरेको छ ।कालिञ्चोक मैदानमा आज बिहान सम्पन्न खेलमा झापाको लालीगुराँस क्रिकेट एकेडेमीलाई सात विकेटले हराउँदै मध्यपश्चिम खाता खोल्न सफल भएको हो । टस जितेर ब्याटिङ गरेको लालीगुराँसले २० ओभरमा ९ विकेट गुमाएर १११ रन बनाएको थियो ।११२ रनको लक्ष्य मध्यपश्चिम क्रिकेट क्लबले तीन विकेट गुमाएर १६.१ ओभरमा पूरा गयो । मध्यपश्चिमको जीतमा बलिङमा आकाश विष्ट र अजय साहनीले तीन÷तीन विकेट लिनुभयो । ब्याटिङमा शैलेन्द्र यादवले अविजित ५३ तथा विशाल गुप्ताले अविजित ४५ रन बनाउनुभयो ।

शैलेन्द्रले ३५ बलमा ९ चौका र १ छक्का तथा विशालले ४३ बलमा पाँच चौका प्रहार गर्नुभयो । यसअघि लालीगुराँसको लागि ब्याटिङमा प्रकाश पटेलले सर्वाधिक ३० तथा धनुश थापाले १८ रन बनाउनुभयो । यो सँगै लालीगुराँस क्रिकेट एकेडेमी लगातार तीन खेलमा पराजित हुँदै प्रतियोगिताबाट बाहिरिएको छ ।यही १२ गतेदेखि जारी प्रतियोगितामा कर्णाली २ खेलमा ४ अङ्कका साथ शीर्ष स्थानमा छ भने त्रिभुवन आर्मी एपिएफ र बुटबलले एक÷एक खेलमा जित हासिल गरेको छ ।  (रासस)

काठमाडौं । बार्सिलोना फेरि स्पेनिस च्याम्पियन बनेको छ । उसले स्पेनिस ला लिगाको उपाधि जितेको हो । ला लिगा फुटबल अन्तर्गत शनिबार राति भएको खेलमा लेभान्टेलाई हराउँदै बार्सिलोनाले लिगका तीन खेल अघि नै उपाधि पक्का गरेको हो । घरेलु मैदानमा भएको खेलमा बार्सिलोनाले लेभान्टेलाई १–० ले हराएको हो । तुलनात्मक रुपमा कमजोर मानिएको टिम लेभान्टेलाई हराउन बार्सिलोनाले मेहनत गर्नु परेको देखियो ।

पहिलो हाफमा गोलरहित बराबरी भएको खेलमा बार्सिलोनाका लागि दोस्रो हाफमा कप्तान लियोनल मेस्सीले विजयी गोल गरेका हुन् । मेस्सीले ६२ औँ मिनेटमा गरेको गोल नै बार्सिलोनाको जितमा निर्णायक बन्यो र तीन खेलअघि नै लिगको उपाधि क्लबको पोल्टामा पार्नका लागि पर्याप्त भयो ।

अटुरो भिडालको हेडरलाई दुई डिफेन्डरलाई छक्याउँदै मेस्सीले गोल गरेका हुन् । मेस्सीले मैदान छिरेको १७ औँ मिनेटमा गोल गरेका हुन् । बार्सिलोनाले २६ औँ पटक ला लिगाको उपाधि जितेको हो । सबैभन्दा बढिपटक उपाधि जितेको रियल मड्रिड भन्दा सात उपाधि कम छ बार्सिलोनाको अर्थात रियल मड्रिडले ३३ पटक ला लिगाको उपाधि जितेको छ ।

ला लिगाको उपाधि जितेको बार्सिलोनाले यो सिजन प्रमुख उपाधिमा ह्याट्रिक गर्ने सम्भावना छ ।च्याम्पियन्स लिगको सेमिफाइनलमा बार्सिलोनाले पहिलो लेगमा लिभरपुलसँग बुधबार खेल्ने छ । यस्तै बार्सिलोना कोपा डेल रे फुटबलको फाइनलमा प्रवेश गरेको छ । उसले मे २५ मा फाइनलमा भ्यालेन्सियासँग खेल्नेछ ।

बार्सिलोनाबाट समग्रमा ३४ औँ उपाधि जितेका मेस्सीले १० औँ पटक ला लिगाको उपाधि जितेका हुन् । उनी १० औँ पटक ला लिगाको उपाधि जित्ने पहिलो खेलाडी बनेका छन् । यस्तै क्लब फुटबलमा ३४ उपाधि जितेका मेस्सी यति धेरै उपाधि जित्ने क्याटलान क्लबका पहिलो खेलाडी हुन् । मेस्सीले यो सिजन ला लिगाको सर्वा्धिक गोलकर्ताको सूचिमा शीर्षस्थानमा छन् ।
उनले अहिलेसम्म ३४ गोल गरिसकेका छन् । उपाधि जितेको बार्सिलोनाले ३५ खेलबाट ८३ अंक भएको छ । दोस्रो स्थानको एथ्लेटिको मड्रिडको ७४ तथा तेस्रो स्थानको रियल मड्रिडको ६५ अंक छ ।

काठमाडौँ, १५ वैशाख : नेपालका युवा खेलाडी प्रिन्स दाहाल थाइल्याण्डको राजधानी बैंककमा जारी ‘योनेक्स सिङ्गा–रोजा बिटिवाई अन्तर्राष्ट्रिय ब्याडमिन्टन प्रतियोगिता’को ब्वाइज यू–१७ को अन्तिम चरणमा मा प्रवेश गरेका छन् । गए राति सम्पन्न खेलमा प्रिन्सले सेमिफाइनलमा भरतीय खेलाडी विकास यादवलाई २–० सोझो सेटमा पराजित गरेका हुन् । उनले पहिलो सेट २१–९ अङ्कले तथा दोस्रो सेट २१–१३ अङ्कले जितेका थिए । यसअघि प्रिन्सले क्वार्टरफाइनलमा थाइल्याण्डका नाथाप्पे श्रीउनलकलाई २–० सोझो सेटमा पराजित गरेका थिए । नाथाप्पेलाई २१–१३ र २१–१४ अङ्कले जितेका उनले अन्तिम चरणको आजको खेलमा भारतीय खेलाडी गान्धम प्रनव रावसँग खेल्ने बैंककमा रहनुभएका प्रिन्सका व्यवस्थापक कमलेश निरौलाले जानकारी दिनुभयो । विभिन्न उमेर समूहको उक्त प्रतियोगितामा २२ देशका खेलाडीको सहभागिता छ ।  (रासस)

मुग्लिन, १३ वैशाख  : अन्तर्राष्ट्रिय याफ्टिङ महासङ्घको आयोजनामा मे १६ देखि १९ सम्म अस्ट्रेलियाको टुली नदीमा आयोजना हुन गइरहेको याफ्टिङ विश्व च्याम्पियनसीपमा नेपालको सहभागिता अन्योलमा परेको छ ।सरकारले सहयोग नगर्ने भएपछि प्रतियोगितामा सहभागी हुने निश्चित नभएको हो । आर्थिक अभावका कारण छनोटमा परेको नेपाल राफ्ट एण्ड कायक क्लब फिस्लिङ (ए)को सहभागिता अन्योलमा परेको हो । अन्योलताबीच पनि दुई महीनादेखि नेपालका विभिन्न नदीमा पूर्वअभ्यास भने भइरहेको क्लबका अध्यक्ष मिलन गुरुङले जानकारी दिनुभयो ।अहिले अपर सेती (माथिल्लो सेती)मा अभ्यास भइरहेको छ । तर आर्थिक अभावका कारण प्रतियोगितामा सहभागी हुने अवस्था निश्चित नभएको अध्यक्ष गुरुङले बताउनुभयो । अध्यक्ष गुरुङले भन्नुभयो, “हामी अहिले अभ्यासमा छौँ तर आवश्यक रकम जुट्न सकेको छैन, प्रतियोगिता अवधिभर रु ३२ लाख खर्च लाग्ने अनुमान गरेका छौँ, अहिलेसम्म कहीँकतैबाट सहयोग आएको छैन, खेलाडी आफैँ खर्च गरेर जान सक्ने अवस्था पनि छैन ।”

सरकारी निकायबाट प्रतियोगिताका लागि सहयोग प्राप्त नभएको उहाँले बताउनुभयो । प्रदेश नं ३ सरकारलाई सहयोगका लागि अपिल गर्दा यससम्बन्धी कुनै पनि शीर्षकमा बजेट नछुट्याएकाले सहयोग गर्न नसकिने प्रतिक्रिया दिएको अध्यक्ष गुरुङले बताउनुभयो ।नेपालको झण्डा लिएर विश्वका खेलाडीमाझ प्रतिस्पर्धा गर्न जाँदा सरकारबाट कुनै सहयोग नभएको गुरुङको गुनासो छ । प्रतियोगिताका लागि सात जना खेलाडी अष्टेलिया जाने तयारीमा छन् । विसं २०७५ फागुन ७ देखी ९ गतेसम्म चितवनको इच्छाकामना गाउँपालिका– ३ स्थित त्रिशूली नदीमा भएको तेस्रो राष्ट्रिय याफ्टिङ च्याम्पियनसीप प्रतियोगितामा विजेता भई छनोटमा परेका नेपाल राफ्ट एण्ड कायक क्लब फिस्लिङ खेलाडी सुरज गुरुङ, सविन गुरुङ, शक्तिकुमार गुरुङ, दीपेश गुरुङ, पदमबहादुर गुरुङ, रविन मियाँ र सुनील गुरुङले विश्व याफ्टिङ प्रतियोगितामा सहभागिता जनाउने छन् । (रासस)

काठमाडौँ, १३ वैशाख : दीपशिखा युवा समूहको आयोजनामा दोस्रो संस्करणको चन्द्रागिरि गोल्डकप प्रतियोगिता यही वैशाख १५ गतेदेखि हुने भएको छ । चन्द्रागिरीस्थित नैकाप खेल मैदानमा हुने उक्त प्रतियोगितामा विभिन्न आठ टोलीको सहभागिता रहने आज यहाँ आयोजित पत्रकार सम्मेलनमा प्रतियोगिता संयोजक रमेश बुढाथोकीले जानकारी दिनुभयो । सहभागी टोलीमा आयोजक दीपशिखा युवा समूहसहित त्रिभुवन आर्मी क्लब, सशस्त्र प्रहरी बल (एपिएफ), जावलाखेल युथ क्लब, सरस्वती युथ क्लब, फेन्ड्रस क्लब, वीरगञ्ज युनाइटेड र च्यासल युथ क्लब छन् । प्रतियोगिताको विजेताले रु पाँच लाख तथा उपविजेता रु तीन लाख पाउनेछ । प्रत्येक खेलमा म्यान अफ द म्याच घोषित खेलाडीले रु पाँच हजार पाउनेछ ।  (रासस)

चितवन, १३ वैशाख : पहिलो पटक अन्तर्राष्ट्रियस्तरको कराँते प्रतियोगिता यहाँ हुनेभएको छ । जापान गोजुरियो कराँते डो केन्वाकाई नेपाल सङ्घ चितवन शाखाको आयोजनामा तेस्रो इण्डो–नेपाल कराँते प्रतियोगिता हुन लागेको सङ्घका सल्लाहकार एवं प्रतियोगिता संयोजक पुष्प आचार्यले जानकारी दिनुभयो ।प्रतियोगिता यही वैशाख १९ गते देखि २१ गतेसम्म भरतपुर महानगरपालिका–१५ मङ्गलपुरमा हुने आयोजकले आज यहाँ पत्रकार सम्मेलनको आयोजना गरी जानकारी दिएको हो । प्रतियोगितामा नेपालका ३५० र भारतका ५० गरी ४०० जना खेलाडीले सहभागिता जनाउने छन् । चितवनबाट मात्र ६० जना खेलाडीले सहभागीता जनाउने उहाँले बताउनु भयो । सहभागी खेलाडीले उमेर समूह, तौल समूह र खुल्लामा प्रतिस्पर्धा गर्ने आचार्यले बताउनुभयो । ६ देखि १३ वर्षका खेलाडीले उमेर समूहमा र १३ देखि १९ वर्षकाले तौल समूहमा प्रतिस्पर्धा गर्नेछन् । १९ वर्ष माथिकाले भने खुल्लातर्फ प्रतिस्पर्धा गर्ने बताइएको छ ।   (रासस)

काठमाडौँ, १३ वैशाख : एशियाली फुटबल महासङ्घ (एएफसी) यू–१९ महिला च्याम्पियनसिप छनोटअन्तर्गत दोस्रो चरणको छनोटको पहिलो खेलमा नेपालले आज बलियो टोली अष्ट्रेलियासँग प्रतिस्पर्धा गर्दैछ दोस्रो चरणको छनोटमा उत्कृष्ट प्रदर्शन गर्ने लक्ष्यसहित म्यान्मा पुगेको नेपालले पहिलो खेलमा अष्ट्रेलियासँग खेल्न लागेको हो । म्यान्माको मण्डलेस्थित मण्डलर थिरी मैदानमा नेपाल र अष्ट्रेलियाबीचको खेल नेपाली समयानुसार दिउँसो ३ः१५ बजे शुरु हुनेछ ।समूह ‘ए’ कै बलियो टोली अष्ट्रेलियाविरुद्ध नेपाल कम्तीमा बराबरी खेल्ने लक्ष्यसहित मैदान उत्रने मुख्य प्रशिक्षक हरिओम श्रेष्ठले बताउनुभयो । “हाम्रो लक्ष्य कम्तीमा बराबरी हो, अघिल्लो चरणमा पुग्न पनि हामीलाई आज एक अङ्क बटुल्नुपर्नेछ”, उहाँले भन्नुभयो ।फिफा वरियतामा अष्ट्रेलिया ४१औँ स्थानमा रहेको छ भने नेपाल १६०औँ स्थानमा रहेको छ । त्यसैले अष्ट्रेलिया नेपालभन्दा निकै बलियो टोली हो । चीनमा एक साता अभ्यास गरेको नेपाली टोली उच्च मनोबलका साथ मैदानमा उत्रने छ । चीनको सिचुवानमा अभ्यास गरेको नेपालले चीनको यू–१५ महिला टोली र छन्दु प्रान्तको यू–१८ टोलीसँग अभ्यास खेलसमेत खेलेको थियो ।

छनोटमा अष्ट्रेलियापछि नेपालले वैशाख १५ मा उज्बेकिस्तान र १७ गते म्यान्मासँग खेल्नेछ । छनोटको शीर्ष टोलीले एएफसी यू–१९ च्याम्पियनसिपमा स्थान बनाउने छन् । गत कात्तिक दोस्रो साता थाइल्याण्डमा भएको पहिलो चरणको छनोटमा नेपाल उपविजेता बन्दै दोस्रो चरणमा प्रवेश गरेको थियो । नेपालले तीन खेलबाट छ अङ्क बनाउँदै दोस्रो चरणमा स्थान बनाएको थियो ।सरु लिम्बूको कप्तानीमा रहेको नेपाली टोलीमा गोलकिपर अञ्जना रानामगर, रेबिका राई, उषा नाथ, डिफेण्डरमा निशा थोकर, रोजिना श्रेष्ठ, सुष्मा महर्जन, समीक्षा घिमिरे, विमला विश्वकर्मा, पूजा रानामगर, सलोनी रानामगर, सबिता रानामगर, मिडफिल्डरमा, मञ्जलीकुमारी योञ्जन, मेनुका आलेमगर, अस्मिता वैद्य, मनिषा राउत, सुहानी कुशुवार, प्रीति राई, सम्झना लावती र स्ट्राइकरमा रश्मीकुमारी घिसिङ, एलिशा जिम्बा, रेखा पौडेल तथा निर्मला उपाध्याय रहेका छन् । (रासस)

एजेन्सी । राजस्थानले कोलकाता नाइटराइडर्सलाई तीन विकेटले पराजित गरेको छ । गएराती सम्पन्न इन्डियन प्रिमियर लिग ९आईपीएल०को खेलमा राजस्थान रोयल्सले चौथो जित निकाल्न सफल भएको हो । टस हारेर ब्याटिङको निम्तो पाएको कोलकाताले २० ओभरमा ६ विकेट गुमाउँदै एक सय ७५ रन बनाउँदा ढुक्क रहेको राजस्थान रोयल्सले ३ विकेटले हराउन सफल भएको हो । दिनेश कार्तिकले अविजित ९७ रन बनाएर खेलेको खेल रोमा१चक मोडमा पुगकेो थियो ।

रसेलले १४ तथा नितीश रानाले २१ रनको योगदान गरेको खेलमा राजस्थानले चार बल बाँकी हुँदा सात विकेट गुमाउँदै लक्ष्य पूरा गरेको थियो । राजस्थानले पहिलो विकेटका लागि ५३ रनको साझेदारी गरेपछि खेल रोमाञ्चक बन्दै थियो त्यतिकैमा उसका मध्यक्रमका खेलाडीबीच राम्रो साझेदारी नहुँदा ९८ रनमा ५ विकेट गुमेपछि उ दबाबमा आयो । तर खेलको अन्तिम समयमा आएका रायन प्राग र जोफ्रा आर्चरले क्रमश ४७ रन बनाए भने आर्चरले अविजित २७ रन बनाएसँगै राजस्थानले ३ विकेटको जित निकाल्यो ।

काठमाडाँै, १२ वैशाख : अखिल नेपाल फुटबल सङ्घ (एन्फा) ले एन्फा एकेडमीका लागि युवा खेलाडीको अन्तिम चरणको छनोट आजदेखि शुरु गरेको छ । एन्फा कम्प्लेक्स सातदोबाटोस्थित एकेडमीका लागि यू–१३ र यू–१६ उमेर समूहका खेलाडी छनोट शुरु गरेको प्रवक्ता किरण राईले जानकारी दिनुभयो । अन्तिम चरणको छनोटमा देश भरबाट छानिएर आएका खेलाडीको सहभागिता रहेको छ । एन्फाले मुलुकभरबाट छनोट भएर आएका खेलाडीबाट समान २५ र २५ जना यू–१३ र यू–१६ खेलाडी छनोट गर्नेछ । छनोट भएका खेलाडीलाई एन्फाले बुटवल र धरानको एकेडमीमा राखेर प्रशिक्षण गराउने छ । उनीहरुलाई एन्फाले फुटबलको प्रशिक्षणसँगै पढाइ र अन्य सुविधा उपलब्ध गराउने जनाएको छ । यस्तै यसै छनोटबाट आएका यू–१६ खेलाडीले एएफसी यू–१६ छनोटमा नेपालको प्रतिनिधित्व गर्ने बताइएको छ । (रासस)

काठमाडौँ, १२ वैशाख : एशियाली क्रिकेट काउन्सिल (एसिसी) यू–१६ पूर्वी क्षेत्रीय क्रिकेट प्रतियोगिताअन्तर्गत नेपाल र आयोजक राष्ट्र थाइल्याण्डबीचको खेल रद्द भएको छ । थाइल्याण्डको चियाङमाईमा चट्याङसहित वर्षा भएपछि नेपाल र थाइल्याण्डबीच भएको समूह चरणको अन्तिम खेल नतिजाविहीन बनेको हो । नेपालले दिएको २३५ रनको लक्ष्यसहित मैदान उत्रेको आयोजक थाइल्याण्डले जवाफी ब्याटिङ गरिरहँदा भारी वर्षा भएपछि खेल पुनः सञ्चालन हुन नसकेकाले रद्द भएको हो ।खेल वर्षाले रोकिनुअघि थाइल्याण्डले एक ओभर ५ बलमा एक विकेट गुमाएर कुनै रन जोड्न सकेको थिएन् । नेपालका प्रशान्त महतले थाइल्याण्डले चावात्रीचाइलाई शून्य रनमा आउट गरेका थिए ।खेल नतिजाविहीन बनेसँगै नेपाल र थाइल्याण्डले एक÷एक अङ्क बाडेका छन् । नेपालले यसअघिका दुई खेल जितेको थियो । थाइल्याण्डसँग अङ्क बाडेसँगै नेपालले समूह विजेताको रुपमा सेमिफाइनलमा स्थान बनाएको छ । नेपालले तीन खेलमा पाँच अङ्क जोड्यो ।

मलेसिया चार अङ्कसहित उपविजेता बन्दै सेमिफाइनलमा पुग्यो ।थाइल्याण्ड र म्यानमार भने समूह चरणबाट बाहिरिएका छन् । थाइल्याण्डले तीन अङ्क जोड्दा म्यानमारले अङ्क जोड्न सकेको थिएन । यसअघि टस जितेर पहिले ब्याटिङ गरेको नेपालले पूरै ३५ ओभर खेल्दै सात विकेट गुमाएर २३४ रन बनाएको थियो ।नेपालको उच्च योगफलमा आशिष भट्टराईले ५८ रनको अर्धशतकीय इनिङ्स खेले । यस्तै विशालविक्रम केसीले ३८ रन र दीपक बोहराले ३५, विशालकुमार पटेलले २८ र निखिलकुमार सिंहले २२ रन बनाएका थिए ।साविकको विजेतासमेत रहेको नेपालले पहिलो खेलमा म्यानमारलाई सात विकेटले पराजित गरेको थियो । यस्तै दोस्रो खेलमा नेपालले मलेसियालाई ३९ रनले पराजित गरेको थियो । अघिल्लो संकरणमा नेपालले सिङ्गापुरलाई ७१ रनले पराजित गर्दै उपाधि जितेको थियो । (रासस)

परासी, १२ वैशाख : समग्र खेल क्षेत्रको विकास र खेलाडीलाई प्रोत्साहन गर्ने नीति र योजना ल्याउन प्रदेश नं ५ सरकारले खेल क्षेत्रको तथ्याङ्क सङ्कलन गरिरहेको जनाएको छ ।प्रादेशिकस्तरमा तथ्याङ्क सङ्कलन भएपछि खेलको पूर्वाधार विकास र खेलाडीको वृत्तिविकास र प्रोत्साहन हुने खालका योजना छनोटमा सहज हुने प्रदेश सरकारको विश्वास छ । पहिलोपटक प्रदेश गठन भएकाले प्रदेशको खेल क्षेत्रको यकिन तथ्याङ्क नहुँदा खेल पूर्वाधारमा आवश्यक लगानी गर्न तथा खेलाडीलाई उचित प्रोत्साहन गर्न नसकिएको प्रदेश सरकारका प्रवक्ता बैजनाथ चौधरीले बताउनुभयो ।राइजिङस्टार सामुदायिक विकास प्रतिष्ठानको आयोजनामा पश्चिम नवलपरासीको भूमहीमा बुधबार दशौँ जिल्लास्तरीय तेक्वान्दो प्रतियोगिता को उद्घाटन गर्दै भौतिक पूर्वाधार विकासमन्त्रीसमेत रहनुभएका चौधरीले भन्नुभयो, “यसपटक प्रदेशको बजेट, नीति तथा कार्यक्रम बनाउँदा हामीले खेल क्षेत्रको तथ्याङ्क सङ्कलन गरी खेलप्रेमीको चाहनाअनुसारको नीति, बजेट र कार्यक्रम छनोट गर्ने योजना बनाएका छौँ, सोहीअनुरुप अहिले प्रादेशिकरूपमा तथ्याङ्क सङ्कलन गरिरहेका छौँ ।”

खेल क्षेत्रको योजना र तथ्याङ्क सङ्कलनमा आवश्यक सहयोग र सुझाव दिन खेलक्षेत्रका सरोकार भएकालाई उहाँले आग्रह गर्नुभयो । आगामी आव २०७६÷७७ को नीति तथा बजेट निर्माणको काम शुरु भइसकेको भन्दै मन्त्री चौधरीले कुन–कुन क्षेत्रमा कस्ता खेल खेलिन्छन्, खेलाडीको अवस्था कस्तो छ, प्रशिक्षक तथा खेल पूर्वाधारको अवस्था के छ जस्ता विषयको तथ्याङ्क लिइने बताउनुभयो ।
जिल्ला खेलकूद विकास समितिका अध्यक्ष कुमार आलेले खेल क्षेत्रबाट देशको नाम उच्च राख्न खेलाडीले ठूलो योगदान गरेको तर उनीहरुको जीवनयापनमा राज्यले ठोस नीति ल्याउन नसक्दा कयौँ प्रतिभावान खेलाडी उदाउन नसकेको बताउनुभएको थियो । दुई दिनसम्म सञ्चालन हुने उक्त प्रतियोगितामा जिल्लाका ११ डोजाङको सहभागिता रहेको प्रतिष्ठानका अध्यक्ष एवं एन्फाका सहमहासचिव प्रकाश पङ्गेनीले जानकारी दिनुभयो ।  (रासस)

काठमाडौँ, १२ वैशाख : थाइल्याण्डमा जारी एसिसी सोह्र वर्षमुनि (यु–१६) पूर्वी क्षेत्रीय क्रिकेट प्रतियोगिताअन्तर्गत आज भएको समूह चरणको अन्तिम खेलमा नेपालले थाइल्याण्डलाई २३५ रनको फराकिलो लक्ष्य दिएको छ ।थाइल्याण्डको चियाङमाई क्रिकेट मैदानमा टस जितेर पहिले ब्याटिङ गरेको नेपालले ३५ ओभरमा सात विकेट गुमाउँदै २३४ रनको योगफल खडा ग¥यो । नेपालका लागि आशिष भट्टराईले सर्वाधिक ५८ रनको योगदान दिए । त्यसैगरी विशालविक्रम केसीले ३८, दीपक बोहराले ३५, विशालकुमार पटेल २८ र निखिलकुमार सिंहले २२ रन जोडे ।

बलिङतर्फ थाइल्याण्डका नारावेट नुन्ताराज एक्लैले तीन तथा योड्साक सारानोननाकुनले दुई विकेट झारे । जारी प्रतियोगितामा नेपालले यसअघि खेलेको दुवै खेलमा विजयी हासिल गरेको छ । नेपालले शनिबार भएको पहिलो खेलमा म्यानमारलाई ७ विकेटले पराजित गरेको थियो भने हिजो बुधबार भएको दोस्रो खेलमा मलेसियालाई ३९ रनले पराजित गरेको थियो । २३५ रनको विजयी लक्ष्य बोकेर अहिले नपाल थाइल्याण्डविरुद्ध जवाफी ब्याटिङमा उत्रेको छ ।  (रासस)

काठमाडौँ, १२ वैशाख : एशियाली क्रिकेट काउन्सिल (एसीसी) यू–१६ पूर्वी क्षेत्रीय क्रिकेट प्रतियोगिताअन्तर्गत समूह चरणको अन्तिम खेलमा नेपालले अहिले आयोजक राष्ट्र थाइल्याण्डसँग खेल शुरु गरेको छ ।थाइल्याण्डको चियाङमाइमा आयोजकविरुद्ध नेपालले टस जितेर पहिले ब्याटिङ रोजेको छ । शुरुआती दुई खेलमा जित निकालेको नेपालले समूह चरणको अन्तिम खेलमा आयोजक थाइल्याण्डसँग खेल्न लागेको हो । आयोजकविरुद्ध मैदानमा उत्रँदा नेपाल शतप्रतिशत जितको खोजीमा हुनेछ ।नेपालले पहिलो खेलमा म्यान्मालाई सात विकेटले पराजित गरेको थियो । बुधबार भएको दोस्रो खेलमा नेपालले मलेशियालाई ३९ रनले पराजित गरेको थियो । समूह ‘ए’ मा रहेको नेपालले दुई खेलबाट चार अङ्क जोड्दै नेपाल शीर्ष स्थानमा छ ।

सेमिफाइनल यात्रा लगभग पक्का गरिसकेको नेपाल समूह विजेताको दौडमा रहेको छ । आयोजकलाई हराउन सके नेपाल समूह विजेता बन्नेछ ।यता आयोजक थाइल्याण्ड नेपाललाई रोक्दै सेमिफाइनल यात्रा तय गर्न चाहन्छ । समूहको तेस्रो स्थानमा रहेको थाइल्याण्डले दुई अङ्क जोडेको छ । नेपाललाई फराकिलो अन्तरले पराजित गरेमा थाइल्याण्डको सेमिफाइनल पुग्ने सम्भावना रहन्छ ।यसै समूहको अर्को खेलमा मलेशियाले म्यान्माको सामना गर्नेछ । मलेशिया चार अङ्क जोडेर दोस्रो र अङ्कविहीन म्यान्मा पुछारमा छ । (रासस)

एजेन्सी । म्यानचेस्टर डर्बीमा सिटीद्धारा युनाइटेड पराजित गरेको छ । इंग्लिस प्रिमियर लिगको उपाधि होड निकै रोमाञ्चक मोडमा पुगेको समयमा गएराति सम्पन्न खेलमा सिटीले युनाइटेडलाई खाता नै खोल्न नदिई शानदार जित आफ्नो नाममा दर्ता गर्न सफल भएको छ । युनाइटेडको घरेलु मैदान वर्ल्ड ट्राफोर्डमा भएको खेलमा सिटीको जितले लिभरपुललाई बाँकी सबै खेल जित्नै पर्ने दबाब र्सिजना गरिदिएको छ । गएरातीको खेलमा सिटीले जित निकालेसँगै लिगमा बाँकी तीन खेल बाँकी हुँदा उपाधि कसले जित्छ भन्ने उत्सुकता थप बढेको छ ।

पहिलो हाफमा गोल रहित बराबरीमा सम्पन्न खेलको ५४ औं मिनेटमा बर्नान्डो सिल्भाले गोल गर्दै टिमलाई एक शुन्यको अग्रता दिलाए । त्यस्तै ६६ औं मिनेटमा लरोइ सानेले सिटीको अग्रता दुई शून्यमा पुर्‍याउँदा युनाइटेडले खाता नै खोल्न नसकेपछि सिटीले शानदार जित निकालेको हो । त्यसअघिको आफ्नो नियमित खेलमा पनि युनाइटेड सिटीलाई एभर्टनले चार शून्यको जित निकालेको थियो । सिटीले ३५ खेलमा ८९ अंक बनाएको छ भने लिभरपुलको समान खेलबाट ८८ अंक रहेको छ । जसका कारण आगामी खेल रोचक बन्ने निश्चित प्राय नै बनेको छ ।

एजेन्सी । रोयल च्यालेञ्जर्स बेंग्लोरद्धारा किंग्स इलेभेन पञ्जाव पराजित भएको छ । इण्डियन प्रिमियर लिग अन्र्तगतको गएराती सम्पन्न खेलमा रोयल च्यालेञ्जर्स बेंग्लोरले किंग्स इलेभेन पञ्जावमाथि १७ रनको जित निकालेर बेंग्लोरले प्लेअफमा पुग्ने आशा कायम राखेको छ । गएरातीको खेल बेंग्लोरले आफ्नो घरेलु मैदानमा नै खेलेको थियो । खेलमा टस हारेर ब्याटिङको निम्तो पाएको घरेलु टिमले २० ओभरमा ४ विकेट गुमाउँदै २०२ रन बनाउँदा एबी डी भिलियर्स र मार्क स्टोनिसले पाँचौं विकेटका लागि आविजित १२१ रनको उत्कृष्ट पार्टनरसिप गरेसँगै पञ्जावलाई थप दबाब पुगेको थियो ।

डी भिलियर्सले ब्यक्तिगत रुपमा ४४ बलमा ८२ रनको आक्रामक खेल खेलेर बेंग्लोरमा थप उत्साह थपेको खेल निकै रोमाञ्चक बनेको थियो । त्यस्तै मार्क स्टोनिसले ३४ बलमा ४६ रन जोड्दा ओपनर पार्थिव पटेलले ७ चौका र २ छक्का प्रहार गर्न सफल भएका थिए । त्यस्तै २०३ रनको लक्ष्य पछ्याएको पञ्जाव २० ओभरमा सात विकेट गुमाउँदै १८५ रन भन्दा माथी जान नसकेपछि उ पराजय बेहोर्न बाध्य भएको हो । जितसँगै बेंग्लोरले ११ खेलबाट ८ अंक बनाउँदै तालिकाको एक स्थान माथि उक्लिन सफल भएको छ ।

बाँके, ११ वैशाख : कार्यवाहक राष्ट्रपति नन्दबहादुर पुनले खेल क्षेत्रमा सरकारले थप लगानी गर्न आवश्यक रहेको बताउनुभएको छ । नेपालगञ्जस्थित महेन्द्र रङ्गशालामा आयोजित आठौँ राष्ट्रिय खेलकूद प्रतियोगिता समापन समारोहलाई सम्बोधन गर्दै उहाँले राष्ट्रलाई स्वस्थ राख्न खेलकूद अपरिहार्य भएको बताउँदै अन्तरराष्ट्रिय प्रतियोगितामा नेपाली खेलाडीलाई सशक्त भूमिका निर्वाह गर्न आग्रह गर्नुभयो । उहाँले भन्नुभयो, “नेपालको राष्ट्रिय झण्डालाई विश्वसामु फहराउन खेलकूदको विकास जरुरी छ ।” निर्धारित समयमै खेलकूद सम्पन्न गरेकामा सरकारप्रति धन्यवाद ज्ञापन गर्दै उहाँले बाँकी रहेका पूर्वाधार सम्पन्न गर्नका लागि पनि अनुरोध गर्नुभयो ।

उहाँले बाँकी रहेका भौतिक पूर्वाधारका काम सम्पन्न गर्दै १३ औँ दक्षिण एशियाली खेलकूदको तयारीमा जुट्न आग्रह गर्नुभयो । कावा राष्ट्रपति पुनले प्रतियोगितामा सहभागी खेलाडी, प्रशिक्षक तथा आयोजकलाई धन्यवाद पनि दिनुभयो । यही वैशाख ५ गते राष्ट्रपति विद्यादेवी भण्डारीले उद्घाटन गर्नुभएको आठौँ राष्ट्रिय खेलकूद प्रतियोगिताको समापन उपराष्ट्रपति पुनले गर्नुभएको हो । उपराष्ट्रपति पुन आज कोहलपुरमा रहने र बिहीबार बर्दियाको बाँसगढी नगरपालिकास्थित केदारेश्वर धामको औपचारिक उद्घाटन गरी काठमाडौँ फर्किने बताइएको छ । (रासस)

काठमाडौँ, ११ वैशाख : थाइल्याण्डमा जारी एसिसी १६ वर्षमुनि (यु–१६) पूर्वी क्षेत्रीय क्रिकेट प्रतियोगिताअन्तर्गत आज भएको आफ्नो दोस्रो खेलमा नेपालले मलेशियालाई पराजित गरेको छ ।थाइल्याण्डको चियाङमाई क्रिकेट मैदानमा भएको खेलमा नेपालले मलेशियालाई ३९ रनले पराजित गर्दै प्रतियोगितामा दोस्रो जित हासिल गरेको हो । नेपालले यसअघि शनिबार भएको पहिलो खेलमा म्यान्मालाई सात विकेटले पराजित गरेको थियो ।जितसँगै समूह ए मा रहेको नेपालले दुई खेलबाट चार अङ्क जोडेको छ । नेपाल साविक विजेतासमेत हो । अघिल्लो संस्करणको खेलमा नेपालले सिङ्गापुरलाई ७१ रनले पराजित गर्दै उपाधि हासिल गरेको थियो ।टस जितेर पहिले ब्याटिङ गरेको नेपालले मलेशियालाई जितका लािग १४२ रनको लक्ष्य दिएको थियो । जवाफमा मलेशिया ३३ दशमलव २ ओभरमा सबै विकेट गुमाउँदै १०२ रनमा समेटियो ।

मलेशियाका लागि सार्भिन सुरेद्रनले सर्वाधिक ४६ रनको योगदान दिए भने अमहेद अस्यार्फले १७ तथा किशन कुमारले ११ रन जोड्नुबाहेक अन्य खेलाडीले दोहोरो रन जोड्न सकेनन् ।मलेशियालाई १०२ रनमा समेट्ने क्रममा नेपालका रमेश कुर्मी, तिलकराज भण्डारी र प्रशान्त महतले दुई÷दुई विकेट लिए । त्यसअघि पहिले ब्याटिङ गरेको नेपालले ३४ दशमलव पाँच ओभरमा सबै विकेट गुमाउँदै १४१ रन जोडेको थियो । नेपालका लागि आशिष भट्टराईले सर्वाधिक ३४ रनको योगदान दिए । त्यस्तै विशालविक्रम केसीले २८, दीपक बोहोरा र अर्जुन कुमालले समान १६÷१६ र सुवास ऐरले ११ रन जोडे ।बलिङतर्फ मलेशियाका सिद्धार्थ कार्तिकले चार तथा लुकम्यान नुर हाकिम सहरले दुई विकेट झारे । नेपालले भोलि आयोजक थाइल्याण्डसँग प्रतिस्पर्धा गर्नेछ । (रासस)

घोराही, ११ वैशाख : आठौँ राष्ट्रिय खेलकूदअन्तर्गत महिला फुटबलमा आज बिहान तेस्रो स्थानका लागि भएको खेलमा नेपाल पुलिस क्लब विजयी भएको छ ।दाङको बेलझुण्डी रङ्गशालामा भएको प्रदेश नं ३ सँगको निकै प्रतिस्पर्धात्मक र रोचक खेलमा ‘सडन डेथ’ बाट पुलिसले जीत हासिल गरेको हो । पहिलो हाफमा कसैले पनि गोल गर्न नसके पनि दोस्रो हाफको २७ औँ मिनेटमा प्रदेश नं ३ का तर्फबाट जर्सी नम्बर ७ की मनिषा थापाले गोलको शुरुआत गर्नुभएको थियो ।३४ औँ मिनेटमा पुलिसका तर्फबाट जर्सी नम्बर १४ की निरु थापाले जवाफी गोल फर्काउनुभयो । निर्धारित समयमा एक÷एक गोलको बराबरी भएपछि खेल टाइब्रेकरमा गएको थियो । टाइब्रेकरमा ४÷४ को बराबर गोल भएपछि अन्तिम नतिजा सडन डेथमा निकालिएको थियो ।

टाइब्रेकरमा पुलिसकी नीरु थापा, घिमकुमारी गुरुङ, सिर्जना खड्का र निर्मला विकले गोल गरेका थिए । टाइब्रेकरमा जर्सी नम्बर ५ की अमृता जैसीले हानेको गोल असफल भएको थियो । त्यसपछि सडन डेथमा जर्सी नम्बर ४ की रेबिका पाण्डे र १९ की रञ्जिता गुरुङले गोल गरेर पुलिसलाई विजयी बनाए ।यसैगरी टाइब्रेकरमा प्रदेश ३ की सुभद्रा खड्का, सञ्जु कुँवर, सुष्मा तामाङ र मनिषा थापा मगरले गोल गरेका थिए । प्रदेश नं ३ की खेलाडी रजनी श्रेष्ठले टाइब्रेकरमा गोल गर्न सक्नुभएको थिएन । त्यसपछि सडन डेथमा प्रदेश ३ की पार्वती घले गोल गर्न सफल भए पनि लक्ष्मी तामाङले गोल गर्न सक्नुभएको थिएन ।महिला फुटबलको उपाधिका लागि आज दुई विभागीय टिम त्रिभुवन आर्मी र सशस्त्र प्रहरीको एपीएफ क्लब भिड्ने भएका छन् । प्रतियोगितामा हावी देखिएका दुवै टिमको फाइनल भिडन्त कडा प्रतिस्पर्धा र रोमाञ्चक हुने अनुमान गरिएको छ । (रासस)

राँझा, ११ वैशाख : आठौँ राष्ट्रिय खेलकूदअन्तर्गत पुरुष भलिबलमा नेपाल पुलिस क्लब र महिला भलिबलमा सशस्त्र प्रहरी बल (एपिएफ) ले उपाधि हात पारेका छन् ।आज खजुरास्थित शुक्र रङ्गशालामा भएको फाइनल खेलमा पुरुषतर्फ पुलिस क्लबले नेपाल आर्मी क्लबलाई र महिलातर्फ एपिएफले प्रदेश नं ३ लाई हराउँदै उपाधि हात पारेको प्रदेश खेलकूद विकास समितिका सदस्य रीता कोइराला जानकारी दिनुभयो ।पुरुषतर्फको खेलमा पहिलो सेट २५–१८ ले आर्मीलाई हराएको पुलिसले दोस्रो सेट २३–२५ ले हारेको थियो । त्यसपछिको खेलमा पुलिसले लगातार दुई सेट २५–२० र २५–१८ ले जित्दै उपाधि हात पारेको हो । तेस्रो स्थानका लागि भएको खेलमा पुरुष भलिबलमा एपिएफ विजयी भएको छ । गण्डकी प्रदेशलाई हराउँदै एपिएफ विजय भएको हो ।

यस्तै महिलातर्फ एपिएफ प्रदेश नं ३ लाई २५–११, २५–१३ र २५–१९ को सोझो सेटमा हराउँदै विजय भएको हो । विजयी खेलाडीलाई पूर्वयुवा तथा खेलकूदमन्त्री दलजीत श्रीपाइलीले पुरस्कार प्रदान गर्नुभएको थियो । यस्तै आजै भएको महिला भलिबल तेस्रो स्थानका लागि भएको खेलमा नेपाल पुलिस क्लब विजय भएको छ । पुलिसले गण्डकी प्रदेशलाई हराएको हो ।प्रतियोगितमा उत्कृष्ट खेलाडी पुरुषतर्फ नेपाल पुलिस क्लबका कुलबहादुर थापा र महिलातर्फ एपिएफकी सरस्वती चौधरी घोषित भएका थिए । उत्कृष्ट खेलाडीलाई लक्ष्मीनारायण मेमोरियल भलिबल ट्रष्टले नगद रु दश÷दश हजार प्रदान गरेको थियो । (रासस)

काठमाडौँ, ११ वैशाख : एसिसी १६ वर्षमुनि (यु–१६) पूर्वी क्षेत्रीय क्रिकेट प्रतियोगिताअन्तर्गत आज भएको दोसो खेलमा नेपालले मलेशियालाई १४२ रनको चुनौती दिएको छ । थाइल्याण्डको चियाङमाई क्रिकेट मैदानमा भएको खेलमा टस जितेर पहिले ब्याटिङ गरेको नेपालले ३४ दशमवल ५ ओभरमा सबै विकेट गुमाउँदै १४१ रनको योगफल बनायो ।

नेपालका लागि आशीष भट्टराईले सर्वाधिक ३४ रनको योगदान दिए भने विशालविक्रम केसीले २८, दीपक बोहोरा र अर्जुन कुमालले समान १६÷१६ तथ सुवास ऐरले ११ रन जोडे । बलिङतर्फ मलेसियाका सिद्धार्थ कार्तिकले चार तथा लुकम्यान नुर हाकिम सहरले दुई विकेट झारे । यसअघि शनिबार भएको पहिलो खेलमा नेपालले म्यानमारलाई सात विकेटले पराजित गरेको थियो । १४२ रनको विजय लक्ष्य पच्छाएको मलेशिया अहिले जवाफी ब्याटिङमा उत्रेको छ । (रासस)

राँझा, ११ वैशाख : आठाँै राष्ट्रिय खेलकूद प्रतियोगिता ऐतिहासिक रुपमा आज सम्पन्न हुँदैछ । पहिलोपटक निर्धारित समय दुई वर्षको अवधिमै आफ्नै अत्याधुनिक भौतिक पूर्वाधार र खेल समावेशका आधारले आठौँ प्रतियोगितासँगै नेपाली खेलकूद नयाँ युगमा प्रवेश गरेको छ ।राष्ट्रिय खेलकूद परिषद् (राखेप)का सदस्य–सचिव केशवकुमार विष्टले आफ्नै पूर्वाधारमा पहिलोपटक प्रतियोगिता गर्न सफल भएकाले ऐतिहासिक भएको बताउनुभयो । “सीमित साधनस्रोतका बीचमा हामीले आफ्नै पूर्वाधारमा विवादरहित ढङ्गले हामीले प्रतियोगिता सम्पन्न गर्दैछाँै”, उहाँले भन्नुभयो, “आठौँको भव्य उद्घाटन समारोह, अत्याधुनिक भौतिक पूर्वाधार र खेलाडीको उत्साह हेर्दा नेपाली खेलकूद नयाँ युगमा प्रवेश गरेको छ ।”प्रतियोगिता विभिन्न ठाउँमा गर्दा खेलाडीलाई केही असहज भएता पनि राष्ट्रिय खेलकूदका अवसरमा पहिलोपटक प्रदेश नं ५ का विभिन्न जिल्लामा धेरै खेलकूदका पूर्वाधार बन्न सकेको उहाँले बताउनुभयो । प्रदेश खेलकूद विकास समिति अध्यक्ष भीम वलीले प्रतियोगिताले नेपाली खेलकूदलाई नयाँ युगमा प्रवेश गराएको बताउनुभयो ।

“खेलकूद परम्परा र संस्कृति जगेर्नाको रुपमा मात्र खेलिँदै आएको थियो”, उहाँले भन्नुभयो, “तर हामीले करोडौँको भौतिक पूर्वाधार निर्माण गरैर साँच्चिकै नेपाली खेलकूदको युग परिवर्तन गर्न सफल भएका छाँै ।” उहाँले काठमाडाँैमा समेत खेलकूदका भौतिक पूर्वाधार नभएको अवस्थामा प्रदेश नं ५ मा खेलकूदका लागि आधुनिक पूर्वाधार तयार गरिएको जानकारी गराउनुभयो ।नेपालगञ्ज रङ्गशालामा बनेको अत्याधुनिक भीआइपी प्यारापिट, रङ्गशालामा नै वर्मुडा दुवै अन्तर्राष्ट्रिय मापदण्डका फुटबल मैदान, पौडीपोखरी, कभर्डहल, भारोत्तोलन एकेडेमी, सुटिङ रेन्ज र एथलेटिक्स ट्र्याक र जुडोहल निर्माण भएका छन् भने बाँकेकै कोहलपुरमा अन्तर्राष्ट्रिय क्रिकेट मैदान र खजुरामा भलिबल रङ्गशाला निर्माण भएका छन् ।बाँकेसहित बर्दिया, दाङ, कपिलवस्तु, रुपन्देही र केही प्रतियोगिता काठमाडाँै, ललितपुर र पोखरामा भएको प्रतियोगितामा ३५ खेलमा करीब पाँच हजार खेलाडीको सहभागी भएका थिए । उपराष्ट्रपति नन्दबहादुर पुनले आज साँझ भव्य समारोहका बीच नेपालगञ्जस्थित रङ्गशालामा समापन गर्ने कार्यक्रम रहेको प्रदेश खेलकूद विकास समितिका अध्यक्ष वलीले जानकारी दिनुभयो ।

गत चैत २७ गतेबाट खेल शुरु गरिए पनि प्रतियोगिताको औपचारिक उद्घाटन भने वैशाख ५ गते राष्ट्रपति विद्यादेवी भण्डारीले नेपालगञ्ज रङ्गशालामा भव्य समारोहका बीच गर्नुभएको थियो । समापन समारोहमा युवा तथा खेलकूदमन्त्री जगतबहादुर विश्वकर्मा र जनप्रतिनिधिलगायतको सहभागिता हुनेछ । प्रतियोगिताको अन्तिम दिन आज फुटबल, भलिबल र पौडीका मात्र फाइनल खेल हुनेछन् ।फुटबलको फाइनलमा नेपाल आर्मी क्लब र नेपाल पुलिस क्लबबीच हुनेछ । यस्तै भलिबलतर्फको खेलमा पुरुषतर्फ नेपाल आर्मी क्लब र नेपाल पुलिस क्लब तथा महिलातर्फ प्रदेश नं ३ र सशस्त्र प्रहरीको (एपिएफ) फाइनलमा प्रवेश गरेका छन् ।समापन समारोहमा नवौँ राष्ट्रिय खेलकूद प्रतियोगिता गर्ने प्रदेशलाई प्रतियोगिताको झण्डा हस्तान्तरण गरिने प्रदेश खेलकूद विकास समिति अध्यक्ष वलीले जानकारी गराउनुभयो । उहाँका अनुसार, समापन समारोहका लागि दिउँसो दुई २ः०० बाटै सर्वसाधारणका लागि प्रवेशद्वार खुला गरिनेछ ।  (रासस)

पटना, ११ वैशाख : २० स्वर्ण पदकसहित नेपाल भारतको पटनामा सम्पन्न अन्तर्राष्ट्रिय खुला कराँते तथा किक बक्सिङ च्याम्पियनसिपमा समूह विजेता बनेको छ ।पटनास्थित पाटलीपुत्र स्पोर्टस कम्प्लेक्समा मङ्गलबार राति सम्पन्न प्रतियोगिताका विभिन्न स्पर्धामा नेपालको कराँते डो मिसन सङ्घको राष्ट्रिय टोलीले २० स्वर्ण पदक जितेको हो । अलइन्डिया सितोरयो कराँते डो एकेडेमीको आयोजना तथा कराँते एशोसिएसन अफ इन्डियाको सहयोगमा आयोजित च्याम्पियनसिपमा नेपाल प्रथम, भारत द्वितीय र बङ्गलादेश तृतीय भएको अलइन्डिया सितोरयो कराँते डो एकेडेमीका अध्यक्ष राजु थापाले जानकारी दिनुभयो ।च्याम्पियनसिपमा नेपाली खेलाडी रुपा रानाले काता र कुमितेतर्फ दुइ स्वर्ण पदक प्राप्त गरिन् । रानाले १९ वर्षमाथिको (सिनियर) उमेर समूहतर्फ ५० केजी तौल समूहको स्पर्धामा स्वर्ण पदक प्राप्त गरेकी हुन् । सुर्खेत गुरुबाकोट नगरपालिकाकी रानाले यसअघि भारतको पुनामा भएको प्रतियोगितामा समेत स्वर्ण पदक प्राप्त गरेकी थिइन् । रानासँगै सिनियरतर्फ सन्तु थारू ५५, छिरीङ गुरुङ ६५, दिलबहादुर बुढाथोकीले ७० केजी तौल समूहको स्पर्धामा नेपाललाई स्वर्ण पदक दिलाए ।

१९ वर्षमुनिको जुनियरतर्फको स्पर्धामा सञ्जय चौधरीले ७० केजी तौल समूहमा स्वर्ण पदक प्राप्त गरे । १७ वर्षमुनिको (सव जुनियर) उमेर समूहमा शिवानी बस्नेत ५०, डिबिन गुरुङ ५०, रोशन राना ६० र सुनिल रावलले ५५ केजी तौल समूहको स्पर्धामा स्वर्ण पदक प्राप्त गरे ।१४ वर्षमुनिको (केडर) उमेर समूहमा प्रियङ्का थापा ५५, इशा सारु ४०, शाहील गुरुङ ३५, जप्वन पुन ४०, मिलन श्रीस ४५, सरोज क्षेत्रीले ५५ केजी तौल समूहको स्पर्धामा स्वर्ण पदक प्राप्त गरे । यसैगरी १० वर्षमुनिको (सवकेडर) उमेर समूहमा अमीषा पोखरेल ३०, आदित्य क्षेत्री २०, विवेक सेन ठकुरी २५ र गौरव पौडेलले ३० केजी तौल समूहको स्पर्धामा स्वर्ण पदक हात पारको मिसन सङ्घका केन्द्रीय सचिव गिरी पुनले जानकारी दिनुभयो ।

यसैगरी प्रतियोगितामा सिनियरतर्फ कुमिते र किक बक्सिङमा नेपालकी दिलमाया कोइराला, बिपीन राना र सञ्जयकुमार चौधरीले रजत पदक प्राप्त गरे । केडरतर्फ आकृति राना र प्रसुन शाहीले रजत पदक प्राप्त गरे भने नेपालका यमन सोती मगरले कास्य पदक हात पारे । भारत, बङ्गलादेश, भुटान, श्रीलङ्कालगायतका देशका २२१ खेलाडीले भाग लिएको च्याम्पियनसिपमा नेपालका २६ खेलाडीले उत्कृष्ट प्रदर्शन गरेको कराँते महासङ्घ प्रदेश नं ५ का अध्यक्ष भरतबहादुर केसीले बताउनुभयो ।विदेशी भूमिमा जित हासिल गरेर खेलाडीले देशको नाम राखेकामा आफूलाई गर्व लागेको जापान गोजुरीयो कराँते डो मिसन सङ्घका संस्थापक तथा नेपाली टोलीका प्रमुख प्रशिक्षक केबी रानाले बताउनुभयो । यसअघि भारतको पुनामा सम्पन्न च्याम्पियनसिपमा १४ स्वर्ण पदक तथा २०१७ मा दिल्लीमा सम्पन्न भएको साउथ एशियन च्याम्पियनसिपमा १७ स्वर्ण पदकसहित विजेता बनेको नेपालले फेरि इतिहास रचेकामा गौरव महसुस भएको मिसन सङ्घका रुपन्देही अध्यक्ष उमेश थापाले बताउनुभयो । (रासस)

एजेन्सी – खेल सुरु भएको ७ सेकेण्डमा नै गोल गरेर आयरल्यान्ड तथा साउथह्याम्टनका फरवार्ड सेन लङले विश्व कितीृमानी राख्न सफल भएका छन् । प्रिमियर लिग अन्तरगत गएराती वाटफोर्डविरुद्धको खेलमा लङले ७ सेकेन्डमै गोल गर्दै प्रिमियर लिगमा सर्वाधिक छिटो गोल गर्ने कीर्तिमान आफ्नो नाममा लेखाउन सफल भएका हुन् । यसभन्दा अघि यो कीर्तिमान टोटेनहमका पुर्व डिफेन्डर लिड्ले किङको नाममा रहेको थियो ।

सन् २००० मा लिड्ले किङले ब्राडफोर्डविरुद्धकरिब १० सेकेन्डमा गोल गर्न सफल भएका थिए । लिड्ले किङको त्यो अनौठो रेकर्ड तोड्दै आयरल्यान्ड तथा साउथह्याम्टनका फरवार्ड सेन लङले सबैलाई चकित पार्दै रकेर्ड आफ्नो नाममा पार्न सफल भएका छन् । वाटफोर्डका जेरार्ड डेउलोफिऊले सुरुवाती बल क्रेइग काथकार्टलाई दिएको थियो ।

उनले बललाई क्लियर गर्न खोज्दा सेन लङले भेटाएपछि प्राप्त बललाई गोलरक्षक विन फोस्टरलाई जिल्याउदै गोल गरेका थिए । त्यस्तै तेस्रो छिटो गोल गर्नेमा एलन सेरर रहेका छन् । उनले ९१० दशमलव ५२ सेकेन्डमा गोल गरेका हुन् । न्यु क्यासलविरुद्ध म्यानचेस्टर सिटीका यि खेलाडीले यो रेकर्ड सन् २००३मा राख्न सफल भएका हुन् ।

एजेन्सी । बार्सिलोनाद्धारा अलाभेसमाथि दुई शून्यको गोल अन्तरले पराजित भएको छ । स्पेनिस ला लिगाको लिग लिडर बार्सिलोनाले गएराती सम्पनन खेलमा अलाभेसमाथि दुई शून्यको सहज जित निकाल्न सफल भएको हो । गएरातीको खेलमा सहज जित निकालेसँगै बार्सिलोनाले ला लिगाको उपाधि यात्रा झन् बलियो बनाएको छ । अलाभेसको घरेलु मैदानमा भएको खेलको पहिलो हाफ बार्सिलोनाले बराबरी खेलेको थियो । तर ५४ औं मिनेटमा सेर्गी रोबर्टको पासमा कार्ल्स एलीनाले गोल गर्दै अग्रता दिलाए को २ मिनेटमा नै अर्को गाले गर्दै अलाभेसलाई थप दबाबमा राख्यो ।

स्टार खेलाडी लियोनल मेसीलाई सुरुमा बेञ्चमा राखेको बार्सिलोनाले ५६ औं मिनेटमा भीएआरको सहयोगमा पेनाल्टी पायो । जसलाई सदुपयोग गर्दै लुइस स्वारेजले ६० औं मिनेटमा बार्सिलोनाका लागी अर्को गोल गरेको खेल निकै रोमाञ्चक बनेको थियो । त्यसपछि घरेलु टिम डिपोर्टिभो खेलमा फर्कन सकेन र पराजित हुँदा बार्सिलोनाले ३४ खेलबाट ८० अंक जोड्न सफल भएको छ । दोस्रो स्थानमा रहेको एट्लेटिको मड्रिड भन्दा बार्सिलोना १२ अंकले अगाडी रहेको छ । आज राती हुने खेलमा दोस्रो स्थानको एट्लेटिको मड्रिडले भ्यालेन्सिया विरुद्धको खेलमा हार ब्यहोरेमा बार्सिलोनाले ला लिगाको उपाधि नै जित्ने पक्का हुनेछ ।

राँझा, १० वैशाख : आठौँ राष्ट्रिय खेलकूद प्रतियोगिताअन्तर्गत उसुमा आर्मी क्लबले सर्वाधिक १४ स्वर्ण पदक जितेको छ । आर्मीले एक रजत र तीन कास्यसमेत जितेको छ । एपिएफ क्लबले पाँच स्वर्ण, आठ रजत र पाँच कास्य तथा पुलिस क्लबले दुई स्वर्ण, एक रजत र पाँच कास्य जित्यो । बाँकी एउटा स्वर्ण कर्णाली प्रदेशले जितेको छ ।आज थाउलोको महिला चियन सू÷छियाङ सुमा एपिएफकी कविता थापा मगरले स्वर्ण जितिन् । सुदूरपश्चिम प्रदेशकी अलिसा खातीले रजत तथा आर्मी क्लबकी मुना शिरिष मगरले कास्य प्राप्त गरिन् । पुरुष ताव सू÷कुन सुमा आर्मीका विश्व बुढा मगरले स्वर्ण, एपिएफका कुमार सिञ्जालीले रजत र प्रदेश ५ का राजीव तामाङले कास्य जिते । सान्सौँको महिला ५२ किलोमा आर्मीकी एलिना चौधरीले सुदूरपश्चिम प्रदेशकी गौरी घर्ती मगर, ५६ किलोमा पुलिस क्लबकी जुनी राईले एपिएफकी कमला बोहरा तथा ६० किलोमा आर्मीकी लुमन्ती श्रेष्ठले एपिएफकी निशा विकलाई पराजित गरी स्वर्ण पदक जितिन् । महिला ६५ किलोमा एपिएफकी मनीषा रावतले प्रहरीकी पूजा गुप्तालाई, ७० किलोमा आर्मीकी विन्दु पुन मगरले प्रदेश १ की तनुजा सुन्दासलाई तथा ७५ किलोमा आर्मीकी शिलु डङ्गोलले गण्डकी प्रदेशकी अनिशा आले मगरलाई स्वर्ण जितिन् ।

सुटिङमा सुस्मिताको कीर्तिमान : आठाँै राष्ट्रिय खेलकूद प्रतियोगिताअन्तर्गत सुटिङतर्फ महिला १० मिटर एयर राइफलमा प्रदेश ३ की सुस्मिता नेपालले आज राष्ट्रिय कीर्तिमान बनाइन् । उनले स्नेहा राज्यलक्ष्मी राणाले राखेप च्याम्पियनशिपमा बनाएको २३३ अङ्कलाई भङ्ग गर्दै २४० पूर्णाङ्कमा २३४ अङ्क बनाई कीर्तिमान बनाइन् । दुई सय २७ अङ्कका साथ आर्मीकी कल्पना परियारले रजत तथा २०३ अङ्कका साथ पुलिस क्लबकी अस्मिता राईले कास्य जितिन् । नेपालगञ्ज रङ्गशालास्थित सुटिङ रेञ्जमा भएको प्रतियोगिताअन्तर्गत सुटिङतर्फ पुरुष १० मिटर एयर राइफलमा प्रदेश ५ का अर्नव घिमिरेले कूल २४० अङ्कमा २१६ अङ्कसहित स्वर्ण, २१४ अङ्क जोडेका पुलिस क्लबका हरिबहादुर थापाले रजत तथा १९६ अङ्क जोडेका आर्मी क्लबका सुरेश चौधरीले कास्य पदक जिते । (रासस)

पटना, १० वैशाख : भारतको बिहार राज्यको राजधानी पटनामा भइरहेको अन्तर्राष्ट्रिय खुला कराते तथा किक बक्सिङ प्रतियोगितामा नेपालले विजयी शुरुआत गरेको छ । पटनास्थित पाटलीपुत्र स्पोर्टस् कम्पेलेक्समा शुरु भएको प्रतियोगिताको पहिलो खेलमा नेपालकी रुपा रानाले कातातर्फ स्वर्ण पदक जितेकी हुन् ।सुर्खेत गुरुबाकोट नगरपालिकाकी रानाले यसअघि भारतकै पूणेमा सम्पन्न प्रतियोगितामा समेत स्वर्ण पदक जितेकी थिइन् । उक्त स्पर्धामा भारतकी अञ्जली कुमारीले रजत तथा भारतकै अनिता कुमारीले कास्य पदक जितिन् । बुधबार प्रतियोगिताका अन्य खेल हुनेछन् । प्रतियोगितामा नेपालसहित आयोजक भारत, श्रीलङ्का, भूटान, बङ्गलादेशलगायत देशका २२१ खेलाडी सहभागी रहेको अल इण्डिया कराते फेडेरेशनका अध्यक्ष राजु थापाले जानकारी दिनुभयो ।

उक्त च्याम्पियनशिपमा भाग लिन नेपालबाट जापान गोजुरियो कराते डो मिसन सङ्घका प्रमुख प्रशिक्षक केवी रानाको नेतृत्वमा टोली पटना आइपुगेको छ । टोलीमा २६ खेलाडी र नौ पदाधिकारी छन् । नेपालबाट विभिन्न उमेर समूह र तौल समूहमा रुपा राना, दिलमाया कोइराला, विपिन राना, सन्तु थारू, अमन सोती मगर, छिरिङ गुरुङ, दिलबहादुर बुढाथोकी र सन्दीप चौधरीले प्रतिस्पर्धा गर्नेछन् ।यस्तै अन्य खेलाडीमा सुमन परियार, सन्दीप चौधरी, शिवानी बस्नेत, विबिन गुरुङ, सुनिल रावल, रोशन राना, इशा सारु, आकृति राना, प्रियङ्का थापा, शाहिल गुरुङ, जीवन पुन, मिलन श्रीश, प्रसुन शाही, सरोज क्षेत्री, आदित्य क्षेत्री, विवेक सेन ठकुरी, गौरव पौडेल र अमीशा पोखरेल रहेका छन् । (रासस)

काठमाडौँ, १० वैशाख :  तेस्रो संस्करणको पाथीभरा राष्ट्रिय पुरुष भलिबल प्रतियोगिता वैशाख तेस्रो सातादेखि ताप्लेजुङमा हुने भएको छ । उक्त प्रतियोगिता यही वैशाख २२ देखि २६ गतेसम्म हुने छ ।नेपाल भलिबल संघ र ताप्लेजुङ जिल्ला भलिबल संघको प्राविधिक सहयोग तथा मौवाखोला क्लब र न्यू पाथीभरा क्लबको सह आयोजनामा सो प्रतियोगिता हुन लागको आज यहाँ आयोजित पत्रकार सम्मेलनमा प्रतियोगिता संयोजक दिवस चोङवाङले जानकारी दिनुभयो । सो प्रतियोगितामा सात प्रदेश, त्रिभुवन आर्मी क्लब, नेपाल प्रहरी, शसस्त्र प्रहरी बल र विश्व विद्यालयको टोली सहभागी हुनेछ ।

प्रतियोगिताको विजेताले रु तीन लाख ५१ हजार ५००, उप–विजेताले रु एक लाख ७६ हजार २५१ र सेमिफाइनलमा पराजित हुने दुवै टोलीले जनही रु ५० हजार पुरस्कार पाउनेछन् । लिग कम नकआउटका आधारमा हुने उक्त प्रतियोगिताको खेल ताप्लेजुङको मौवाखोला गाउँपालिका– ३ साघुस्थित नारायणी माविको खेल मैदानमा हुनेछ । (रासस)

घोराही, १० वैशाख : आठाँै राष्ट्रिय खेलकुद प्रतियोगिताअन्तर्गत महिला फुटबलको फाइनलमा त्रिभुवन आर्मी क्लब प्रवेश गरेको छ । आज बिहान बेलझुण्डी रङ्गशालामा भएको खेलमा प्रदेश ३ लाई शून्यका विरुद्ध ६ गोलले पराजित गर्दै आर्मी फाइनलमा प्रवेश गरेको हो ।  खेलमा आर्मीका शर्मिला थापा र कृष्णा खत्रीले २ र २ गोल गरेका थिए । जर्सी नम्बर ९ की थापाले पहिलो हाफको ३७ र ४० औंँ मिनेटमा लगातार गोल गरेकी थिइन् । जर्सी नम्बर १० की खत्रीले दोस्रो हाफको १५ र २२ आँै मिनेटमा लगातार गोल गरेकी थिइन् । जर्सी नम्बर १५ की विमला चौधरीले पहिलो हाफको १० औंँ र जर्सी नम्बर २३ की इन्दिरा राईले दोस्रो हाफको ३५ औंँ मिनेटमा गोल गरेका थिए । अपराह्न साढे ३ बजेदेखि नेपाल पुलिस र एपिएफबीच फाइनल प्रवेशका लागि खेल हुँदैछ ।  (रासस)

काठमाडौँ, १० वैशाख : प्रदेश नंं ५ मा जारी आठौं राष्ट्रिय खेलकुद प्रतियोगिता सकिन एक दिन बाँकी छँदा अङ्क तालिकामा विभागीय टोली त्रिभुवन आर्मी क्लबको अग्रता कायमै रहेको छ । आज १५ औँ दिनको खेल जारी रहँदा प्रतियोगितामा २०७ स्वर्णसहित कुल ७१४ पदकको टुङ्गो लागिसकेको छ । अहिलेसम्म विभागीय टोली त्रिभुवन आर्मी, नेपाल प्रहरी र सशस्त्र प्रहरीको एपिएफले आफ्नो वर्चश्व कायम गरेका छन् ।पदक तालिकामा विभागीय टोली त्रिभुवन आर्मी क्लबले एकछत्र राज गरिरहेको छ । सर्वाधिक पदक जितेको आर्मीले ८७ स्वर्ण, ५५ रजत र ४४ कास्य पदकसहित कुल १८६ पदक जितिसकेको छ । दोस्रो स्थानको सशस्त्र प्रहरीको एपिएफ क्लबले ३५ स्वर्ण, ३६ रजत र ४४ कास्यसहित कुल ११५ पदक जितेको छ ।तेस्रो स्थानमा रहेको नेपाल पुलिस क्लबले ३३ स्वर्ण, ३३ रजत र ३२ कास्य पदकसहित कुल ९८ पदक जितेको छ । चौथो स्थानको प्रदेश ३ ले १६ स्वर्ण, २४ रजत र ३९ कास्य पदक गरी ७९ पदक हात पारेको छ । पाँचौमा रहेको प्रदेश ५ ले सात स्वर्ण, १७ रजत र ३३ कास्यसहित ५७ पदक जित्दा छैटौँमा रहेको सुदूरपश्चिम प्रदेशले सात स्वर्ण, पाँच रजत र १९ कास्यसहित ३१ पदक जितेको छ ।

सातौँ स्थानको गण्डकी प्रदेशले छ स्वर्ण, ११ रजत र २९ कास्यसहित ४६ पदक जितेको छ भने आठौँ स्थानको प्रदेश २ ले छ स्वर्ण, सात रजत र १४ कास्यसहित २७ पदक जितेको छ । नवौँ स्थानको प्रदेश १ ले चार स्वर्ण, १६ रजत र ३७ कास्यसहित ५७ पदक जित्दा दशौँ स्थानको गैरआवासीय नेपाली सङ्घ (एनआरएनए)ले चार स्वर्ण र चार कास्यसहित आठ र कर्णाली प्रदेशले दुई स्वर्ण, दुई रजत र छ कास्यसहित १० पदक जितेको छ ।प्रतियोगितामा ३७२ स्वर्ण, ३७२ रजत र ५६३ कास्य पदकका लागि पाँच जहार २११ खेलाडी प्रतिष्पर्धामा सहभागी रहेका छन् । प्रतियोगिताको बुधबार विशेष कार्यक्रमकाबीच प्रधानमन्त्री केपी शर्मा ओलीले समापन गर्नुहुनेछ । प्रत्येक दुई÷दुई वर्षको अन्तराल गर्ने लक्ष्यसहित २०३८ सालमा शुरु भएको राष्ट्रिय खेलकुदको शुरुका तीन संस्करण बाहेक कुनैपनि राष्ट्रिय खेलकुद दुई वर्षको अवधिमा हुन सकेको छैन ।वैशाख ५ गते औपचारिक उद्घाटन भएको प्रतियोगिताका खेलहरू भने चैत २७ गतेदेखि नै शुरु भएका थिए । प्रतियोगिताका खेलहरू बाँकेमा १७, दाङमा सात, रुपन्देहीमा चार, बर्दियामा चार, ललितपुर, कास्की, कपिलवस्तु र काठमाडौँमा एक÷एक खेलहरू आयोजना भएका छन् ।

बाँकेमा पुरुष फुटबल, बक्सिङ, भलिबल, टेबलटेनिस, उसु, जुडो, ह्याडबल, कराँते, हक्की, सुटिङ, जिम्न्याष्टिक, साइकिलिङ, आर्चरी, फेन्सिङ, पौडी, ट्रायथलन र पुरुष क्रिकेटका खेल जारी छ भने दाङमा महिला फुटबल, एथ्लेटिक्स, कराँते, ब्याटमिन्टन, बास्केटबल, आइटिएफ तेक्वान्दो र महिला क्रिकेटका खेल भइरहेका छन् ।त्यस्तै रुपन्देहीमा शारीरिक सुगठन, सफ्ट टेनिस, लनटेनिस, तेक्वान्दोका खेल आयोजना भएका छन् । बर्दियामा कबड्डी, बुद्धिचाल, खोखो, सेपाकताक्रो, ललितपुरमा स्क्वास, कास्कीमा प्याराग्लाइडिङ, कपिलवस्तुमा कुस्ती र काठमाडौँमा गल्फ प्रतियोगिता जारी छ ।प्रतियोगितामा प्रदेश नम्बर १, प्रदेश नम्बर २, प्रदेश नम्बर ३, गण्डकी प्रदेश, प्रदेश नम्बर ५, कर्णाली प्रदेश, सुदूरपश्चिम प्रदेश, नेपाल प्रहरी, सशस्त्र प्रहरी, नेपाली सेना र गैरआवासीय नेपाली सङ्घ (एनआरएनए)ले सहभागिता जनाएका छन् ।प्रतियोगितामा फुटबल, एथलेटिक्स, बक्सिङ, भारोत्तोलन, टेबल टेनिस, क्रिकेट, लन टेनिस, पौडी, सुटिङ, भलिबल, स्क्वास, तेक्वान्दो, जुडो, आर्चरी, कबड्डी, खो खो, उसु, बास्केटबल, ब्याडमिन्टन, साइक्लिङ, कराते, कुस्ती, फेन्सिङ, ट्रायथलन, प्याराग्लाइडिङ, गल्फ, ह्याण्डवल, बुद्धिचाल, सफ्टटेनिस, आइ.टिएफ तेक्वान्दो, सेपाकताक्रो, जिम्न्याष्टिक, शारीरिक सुगठन, फुलकन्ट्याक्ट कराते र हक्की खेल सहभागी गरिएको छ । (रासस)

काठमाडौँ, १० वैशाख : ह्विल चियर क्रिकेटको एशिया कप यही वैशाख १८ देखि २१ गतेसम्म नेपालमा आयोजना हुने भएको छ ।पहिलो पटक हुन लागेका प्रतियोगिता वैशाख १८ देखि २१ गतेसम्म गर्ने तय भएको ह्विल चियर क्रिकेट सङ्घका अध्यक्ष छुल्टिम ग्याल्जेन शेर्पाले राससलाई जानकारी दिनुभयो । टि–२० फरम्याटमा हुने प्रतियोगितामा आयोजक नेपालसहित, भारत, बङ्गलादेश र पाकिस्तान सहभागी हुने उहाँले जानकारी दिनुभयो । प्रतियोगिताका सबै खेल पुल्चोकस्थित इञ्जिनीयरिङ क्याम्पसको खेलमैदानमा हुने अध्यक्ष शेर्पाले जानकारी दिनुभयो । टि–२० फरम्याटमा हुने ह्विल चियर एशिया कप क्रिकेट विश्वमै पहिलो पटक आयोजना हुन लागेको उहाँको दाबी छ ।  (रासस)

घोराही, १० वैशाख : आठौँ राष्ट्रिय खेलकूद प्रदेश नं ५ का विभिन्न जिल्लामा चलिरहेको छ । अहिले दाङ, बाँके, बर्दिया, कपिलवस्तु, रुपन्देही र पाल्पामा खेल भइरहेका छन् । विशेषगरी बाँके र दाङमा राष्ट्रिय प्रतियोगिताका अधिकांश खेल भइरहेका छन् ।
दाङमा छनोट भएका सात खेलमध्ये बास्केटबल, ब्याडमिन्टन, टेबुलटेनिस र एथलेटिक्स सकिए भने कराँते, महिला फुटबल र महिला क्रिकेट चलिरहेका छन् । प्रदेश नं ५ को केन्द्रमा पर्ने दाङमा पछिल्लो समय शहरीकरण बढ्दो छ । सोहीअनुसार यहाँको बजार पनि महङ्गिँदै गएको छ । तर, राष्ट्रिय प्रतियोगिता जिल्लामा चलिरहँदा राष्ट्रियस्तरको खेलाडीका लागि दिइएको सेवासुविधा र यहाँको बजार मूल्यबीच मेल खान सकेको छैन ।सबै खेलका खेलाडीलाई दैनिक रु एक हजार ४०० भत्ता दिइएको छ । तर यहाँको होटलका कोठा सात÷आठ सयदेखि पाँच हजारसम्म मूल्यका छन । केही दिन पहिला सकिएको बास्केटबल, टेबुलटेनिस, ब्याडमिन्टनका केही खेलाडी यहाँको व्यवस्थापन समितिले व्यवस्था गरेको होटल चित्त नबुझेपछि आफ्नै पैसामा छुट्टै होटलमा बसेका थिए ।

अहिले महिला क्रिकेट लमहीको खेलमैदानमा चलिरहेको छ । तर त्यहाँ खेल्ने खेलाडीले समयमा जर्सीसमेत पाउन सकेका छैनन् । हिजो मात्रै खेलबाट बाहिरिएको प्रदेश नं ५ को महिला क्रिकेट खेलाडीले तीन खेल पुरानो जर्सीमा खेले । खेलमा उनीहरुले लगातार पराजित भएपछि, खेलबाट बाहिरिएका प्रदेश नं ५ का खेलाडीले जाने समयमा जर्सी लिएर घर गएका छन् ।जिल्ला क्रिकेट सङ्घका अध्यक्ष प्रदीप मजगैँयाका अनुसार खेलाडीले आवश्यकताअनुसार भत्ता नपाउनु, जर्सी नपाउनु, स्तरीय होटलमा बस्न नपाउनुजस्ता समस्या झेलिरहेका छन् । उहाँले पछिल्लो बजार भाउअनुसार खेलाडीलाई भत्तासमेत निकै थोरै भएकोप्रति चित्त दुखाउनुभयो । जिल्ला खेलकूद समितिले क्रिकेट सञ्चालनका लागि आफूहरुसँग कुनै समन्वय नगरे पनि जिल्लामा क्रिकेट सञ्चालन भइरहेको हुदाँ क्रिकेटप्रतिको माया, इज्जतकै कारण आफूहरुले सबै प्राविधिक सहयोग गरेको उहाँको भनाइ छ ।“जिल्लालाई सात राष्ट्रिय खेल खेलाउने अवसर जुरेको छ, तर व्यवस्थापन वडा तहमा खेलाइने खेल जतिको पनि छैन”, अध्यक्ष मजगैँयाले भन्नुभयो, “यहाँ भएका कुनै पनि खेल त्यहीसँग सम्बन्धित सङ्घसस्थालाई दिइएको छैन । हामीले त क्रिकेटको लाज छोप्नको लागि पनि सहयोग गरिरहेका छौँ ।”

जिल्ला खेलकूद समितिका पदाधिकारीले सबै खेलमा संयोजनको जिम्मेवारी बाँडेका छन् । तर खेलअनुसार खेलाडी र पूर्वाधारको व्यवस्थापन हुनसकेको छैन, जसका कारण यहाँ भइरहेको खेल व्यवस्थापनलाई सबैले फितलो भन्दै टिप्पणी गरिरहेका छन् ।जिल्लामा खेलसँग सम्बन्धित सङ्घ, सङ्गठन आफ्नै उत्पादनका खेलाडी, आफ्नै चिनेजानेका साथी जिल्लामा आउँदा सक्रियताका साथ खेलकूदमा सहभागिता जनाएको देखिन्छ । तर यहाँको पूर्वाधार समस्या, खेल खेलाउने ठाउँको सही छनोट नहुँदासमेत समस्या भएको छ ।अहिले जिल्लामा महिला फुटबलसमेत चलिरहेको छ । राष्ट्रिय खेलमा सहभागी १० समूहमध्ये आधा दाङ र आधा कपिलवस्तुमा खेले । तर सेमिफाइनल र फाइनल खेल भने दाङमा हुँदैछ । दाङमा पनि बिहानको खेल घोराहीमा र साँझको खेल तुलसीपुरमा गराइएको छ । तुलसीपुरमा भर्खरै निर्माण गरिएको रङ्गशालामा राष्ट्रिय खेलकूद शुरु भएपछि तयारी थालिएको थियो । समयमा मैदान तयार नहुँदा रङ्गशालामा फुटबल खेल्नै समस्या भएको खेलाडीले बताएका छन् । तुलसीपुरमा कराँतेका लागि निर्माण गरिएको कवर्डहल पूर्ण छैन । हलको आधा भाग मात्रै छानो लगाइएको छ । तत्काल भित्री भाग घाम छेक्नका लागि त्रिपाल लगाएर खेल सञ्चालन भइरहेको छ ।

मैदानमा रोपिएको दुबोसहितको माटो सम्याउने काम नगर्दा बल हानेको ठाउँतिर नगई अन्तै मोडिने समस्या देखिएको छ । त्यसमाथि बजार क्षेत्रभन्दा टाढा भएको हँुदा रङ्गशालामा राष्ट्रिय खेल हँुदा न खेलाडीले दर्शक पाएका छन् न खाजा खाने ठाउँ, न केही समस्या भइहाले तत्काल उपचारको व्यवस्था ।जिल्ला फुटबल सङ्घका महासचिव नरेन्द्र पुनमगर पनि बजार क्षेत्रभन्दा टाढा खेल हुँदा खेलाडीलाई समस्या हुने चिन्ता व्यक्त गर्नुहुन्छ । “कुनै दुर्घटना भए तुरुन्त अस्पताल ल्याउनुपर्ने हुन्छ, खेलाडीलाई भोकप्यास लाग्दा होटल चाहिन्छ त्यो सबै बेलझुण्डी रङ्गशालाबाट टाढा छ”, उहाँले भन्नुभयो, “राष्ट्रिय खेलमा पूर्वाधार बन्यो तर अपरिपक्व व्यवस्थापन भयो ।” खेलमैदान तयार भए पनि सबैसँग समन्वय नहुँदा राष्ट्रिय खेलको गरिमा जोगिन नसकेको उहाँले बताउनुभयो ।यस्तै जिल्ला फुटबल सङ्घका जिल्ला अध्यक्ष सुशील श्रेष्ठ भने आफूले फुटबलसँग जोडिएका सबै खेलाडी र प्रशिक्षक, रेफ्रीलाई उचित व्यवस्थापनसँग राखेको बताउनुहुन्छ । “उनीहरुको खानपान र आवास सबै हेरिरहेको छु, कुनै कमी हुन दिएको छैन”, उहाँले भन्नुभयो ।

केही जिल्ला खेलकूद सङ्घका पदाधिकारीले नै अध्यक्ष डिल्ली डाँगीले आफ्नो क्षेत्र भन्दै मनोमानी गरेको आरोप लगाएका छन् । तर, जिल्ला खेलकूद विकास समितिका अध्यक्ष डिल्लीबहादुर डाँगीले भने आफूले निकै मेहनत गरेर खेलकूदको पूर्वाधार तयार गरेको बताउनुहुन्छ । खेलकूदको संरचना निर्माण गर्दा आवश्यक सामग्री र बनाउने निर्माणकर्तासमेत बाहिरबाट ल्याउनुपर्ने हुँदा धेरै कठिनाइ भएको हुँदा सबै संरचना समयमा बन्न नसकेको उहाँको भनाइ छ । “दुबोसमेत नेपालमा नपाएर कोलकाताबाट ल्यायाँै”, उहाँले भन्नुभयो, “आवश्यक सामग्री यहाँ पाइँदैन, बाहिरबाट ल्याउँदा तीन महीना अगाडिलाई भन्नुपर्छ ।” विभिन्न कारणले एक वर्षभित्रै सबै प्रक्रिया पुयाउन र संरचना निर्माण गर्न निकै समस्या भएको उहाँले बताउनुभयो ।जिल्लामा राष्ट्रिय खेल आयोजना गर्नु, करोडौँको भौतिक संरचना तयार हुनुले जिल्लाको गौरव बढेको र आगामी दिनमा हुने खेलकूदका कार्यक्रमसमेत आफूहरुले सहजै तयार पार्ने उहाँ दाबी गर्नुहुन्छ । खेलाडीलाई भत्ताको व्यवस्था निकै थोरै भएको भन्ने गुनासो आइरहेको समयमा जिल्ला अध्यक्ष डाँगीले भने आफूहरुले प्रतिखेलाडी रु दुई ५०० मागे पनि सरकारले नदिएपछि रु एक हजार ४०० मै चित्त बुझाउनुपरेको सुनाउनुहुन्छ । (रासस)

काठमाडौँ, ९ वैशाख : प्रदेश नंं ५ मा जारी आठौँ राष्ट्रिय खेलकूदअन्तर्गत तेक्वान्दो र कराँतेमा विभागीय टोलीले जीत निकालेका छन् । आइतबार साँझसम्म सम्पन्न १२ खेलमध्ये तेक्वान्दो र कराँतेमा विभागीय टोलीकै दबदबा कायम रहेको छ ।राष्ट्रिय खेलकूद प्रतियोगिताअन्तर्गत भैरहवामा जारी तेक्वान्दो खेलमा स्पाइरिङ विधामा आठ स्वर्ण पदकको टुङगो लाग्दा सबै आठवटै स्वर्ण पदक विभागीय टोलीले जित्न सफल भएका छन् । नेपाली सेनाले चार, नेपाल पुलिस र एपिएफले दुई÷दुई स्वर्ण पदक जित्न सफल भएका छन् ।पुरुष ६३ केजीमुनिमा नेपाल पुलिसका वीरबहादर महराले स्वर्ण, नेपाली सेनाका मोहन तामाङले रजत र प्रदेश २ का जेकी यादव र कर्णाली प्रदेशका दिपक शाहीले कास्य जितेका छन् । त्यसैगरी पुरुषकै ७४ केजी तौलमुनि नेपाली सेनाका निशान श्रेष्ठले स्वर्ण, एपिएफका निरज देउजाले रजत र पुलिसका निश्चलमान श्रेष्ठ र प्रदेश १ का नेत्रबहादुर कार्कीले कास्य प्राप्त गरेका छन् ।

पुरुष ८७ केजी तौल नेपाल आर्मीका भुपेन श्रेष्ठले स्वर्ण, नेपाल पुलिसका दिनेश हमालले रजत र सुदूरपश्चिम प्रदेशका ओमजङ्ग सिंह र प्रदेश २ का अमितकुमार सिंहले कास्य पदक जितेका छन् । त्यस्तै पुरुषकै ८० केजी तौल समूह मुनि नेपाली सेनाका सक्षम कार्कीले स्वर्ण, नेपाल पुलिसका किरण सितेकु र प्रदेश ३ का विष्णु तामाङले कास्य पदक प्राप्त गरेका छन् ।महिलातर्फ ५७ केजी तौल समूहमुनि एपिएफकी गीता विष्टले स्वर्ण, नेपाल पुलिसकी सुष्मा श्रेष्ठले रजत र प्रदेश ३ की सुस्मिता मोक्तान र प्रदेश २ की शुभेक्षा राईले कास्य पदक जितेका छन् । महिलाकै ६२ केजी तौलमुनि एपिएफकी सङ्गीता बस्यालले स्वर्ण, प्रदेश २ की शिवानी श्रेष्ठले रजत र नेपाली सेनाकी मुस्कान कार्की र नेपाल पुलिसकी कञ्चन थापाले कास्य पदक जितेका छन् ।त्यसैगरी ६७ केजी मुनितर्फ नेपाली सेनाकी नम्रता तुलाधरले स्वर्ण, पुलिसकी सीता तामाङले रजत र प्रदेश ५ की रामरती थारु र गण्डकी प्रदेशकी ममता गर्बुजाले कास्य पदक प्राप्त गरेका छन् । महिलाकै ७३ केजी तौलमुनिमा नेपाल पुलीसकी सुमित्रा केसीले स्वर्ण, एपिएफकी अप्सरा कार्कीले रजत र कर्णाली प्रदेशकी इला केसी एवम् नेपाली सेनाकी प्रतिज्ञा भण्डारीले कास्य पदक जितेका छन् ।

करातेतर्फ आठौँ राष्ट्रिय खेलकूदअन्तर्गत दाङको तुलसीपुरमा जारी कराते प्रतियोगिता महिला ४२ केजी कुमुतेतर्फ एपिएफकी जीया कार्कीले स्वर्ण पदक हात पारेकी छन् । त्यस्तै नेपाली सेनाकी कुसुम खड्काले रजत जित्दा प्रदेश नं २ की मीरा योञ्जन र प्रदेश नं ७ की वर्षा साउदले रजत पदक हात पार्न सफल भएका छन् ।त्यस्तै ५० केजी महिला कुमुतेतर्फ नेपाली सेनाकी मिस्ली श्रेष्ठले स्वर्ण जितिन् । एपिएफकी अनु अधिकारीले रजत जित्दा प्रदेश नं २ की एलिसा तामाङ र प्रदेश नं ३ की सविना श्रेष्ठले रजत जिते । त्यस्तै ५० केजी पुरुष कुमुतेतर्फ नेपाल प्रहरीका सोनाम लामाले स्वर्ण जिते । त्यस्तै एपिएफका वीरबहादुर तामाङले रजत जित्दा प्रदेश नं ३ का साजन मोक्तान र नेपाली सेनाका विश्व खत्रीले कास्य पदक हात जितेका छन् ।प्रतियोगिताअन्तर्गत हालसम्म १८ वटा खेलहरु टेबलटेनिस, ट्रायथलन, कुस्ती, फेन्सिङ, साइक्लिङ, स्क्वास, जुडो, कबड्डी, फुल कन्ट्याक्ट कराते, बास्केटबल, गल्फ, बुद्धिचाल, लनटेनिस, हक्की, शारीरिक सुगठन, ब्याडमिन्टन र आर्चरीका खेलहरु सम्पन्न भइसेका छन् । प्रतियोगितामा समावेश गरिएका ३५ मध्ये अब १७ वटा खेलको नजिता आउन बाँकी रहेका छन् ।  (रासस)

काठमाडौं । ईङ्ल्याण्ड विश्वकपका लागि श्रीलंकाले आफ्नो टोलीको घोषणा गरेको छ। श्रीलंकाले दिमुथ करूणारत्नेको कप्तानीमा १५ सदस्यीय टोलीको घोषणा गरेको हो । सन् २०१५ मा विश्वकपमा वान डे खेले यता श्रीलंकाका लागि कुनै एकदिवसीय नखेलेका दिमुथलाई कप्तानीको जिम्मेवारी दिइएकोमा धेरैलाई आश्चर्यमा पारेको छ। श्रीलंका क्रिकेट बोर्ड प्रमुख शम्मी सिल्वाले बिहीबार टोलीको घोषणा गरेका हुन्।

श्रीलंकाको विश्वकप टोलीमा दिमुण करीणारत्ने९कप्तान०, लसिथ मलिंगा, एन्जेलो म्याथुज, तिसारा परेरा, कुसल परेरा, धनञ्जय डि सिल्वा, कुशल मेन्डिस, इसरू उदाना, मिलिन्दा सिरिवर्धने, अविष्का फर्नाडो, जीवन, मेन्डिस, लाहिरू थिरिमन्ने, जैफ्री बेन्डरसे, नुवान प्रदीप र सुरङ्गा लकमल रहेका छन् । विश्वकपमा श्रीलंकाको पहिलो भिडन्त न्यूजल्याण्डसँग हुनेछ।

काठमाडौंं । सरकारले इन्टरनेटमा खेलिने पब्जी खेलमा प्रतिबन्ध लगाएपछि युवाहरुको आक्रोशित भएका थिए । यद्यपी पब्जी खेलमा प्रतिबन्ध लगाउने निर्णय कार्यान्वयन नगर्न सर्वाेच्च अदालतले सरकारलाई आदेश दिइसकेको छ । दूर सञ्चार प्राधिकरणले इन्टरनेट प्रदायक कम्पनीलाई पब्जी गेम बन्द गर्न निर्देशन दिएको थियो । उक्त निर्देशनको युवाहरुले व्यापक विरोध जनाएका थिए । आक्रोशित युवाहरुले सरकारको कडा आलोचना पनि गरे । तर, सर्वाेच्च अदालतको आदेशपछि युवाहरु खुसी भएका छन् ।

काठमाडौं । भारतीय सञ्चार माध्यमहरुले नेपाली लेग स्पिनर सन्दीप लामिछानेको तारिफ गर्दै समाचार सम्प्रेषण गरेका छन् । भारतमा जारी आइपीएलमा दिल्ली क्यापिटल्सबाट खेलिरहेका सन्दीपलाई सचिन तेन्दुलकरसँग तुलना गरेर समाचार प्रकाशित भएका हुन् । जारी आइपीलमा सन्दीपको टिम दिल्लीले राम्रो प्रदर्शन गरिरहेको छ ।

दिल्लीले किङ्स इलाभेन पन्जाबलाई हराउँदा सन्दीप लामिछानेले आफ्नो जादुमय प्रदर्शन गरेका छ्न । उनले ४० रनमा ३ विकेट लिएका थिए। लामिछाने स्टाईलिस प्लेयर अफ द म्याच बनेर भारु एक लाख पुरस्कार पाएका छ्न। सन्दीपले कृश गेल, लोकेश राहुल र साम कुरानको विकेट लिएर आफ्नो उत्कृष्ट प्रदर्शन गरिसकेका छन् ।

बाँके, ८ वैशाख  : आठौँ राष्ट्रिय खेलकूद प्रतियोगिताअन्तर्गत बाँकेको नेपालगञ्जमा आज भएको पौडी प्रतियोगितामा त्रिभुवन आर्मी क्लबले तीन स्वर्ण जितेको छ ।चार स्पर्धाको प्रतिस्पर्धामा एनआरएनएले एक स्वर्ण हात पारेको छ । महिला ८०० मिटर फ्रिस्टाइल स्पर्धामा त्रिभुवन आर्मीका उपास्ती महर्जनलाई पराजित गरी त्रिभुवन आर्मीकै गौरिका सिंहले स्वर्ण पदक हात पारिन् ।उक्त विधामा नेपाल पुलिस क्लबका सामिरा शोभा थापाले कास्यमा चित्त बुझाइन् । त्यस्तै पुरुष ८०० मिटर फ्रिस्टाइल पौडी प्रतियोगितामा एनआरएनएका नाथनध्वज श्रेष्ठले स्वर्ण पदक हात पारे भने एपीएफका नासिर हुसैनले रजत र एपीएफकै अर्जिन महर्जनले कास्य पद हात पारे ।

यसैगरी, महिला २०० मिटर पौडी प्रतियोगितामा त्रिभुवन आर्मीकी दुआना लामाले स्वर्ण हात पार्दा एपीएफ क्लबका श्रीवी महर्जनले रजत र एपीएफकै दिया स्थापितले कास्यमा चित्त बुझाइन् । पुरुष २०० मिटर पौडी प्रतियोगितामा त्रिभुवन आर्मीका अनुभव सुब्बाले स्वर्ण जिते । उनले दुई मिनेट २० सेकेण्डमा दूरी पार गरे भने २ मिनेट २३ सेकेण्डमा दूरी पार गरी एनआरएनएका नथनध्वज श्रेष्ठले रजत र नेपाल पुलिस क्लबका सैयद हमजा शाहले कास्य पदक जितेका छन् । (रासस)

नेपालगञ्ज ८ वैशाख, : आठांँ राष्ट्रिय खेलकूद प्रतियोगितामा खेलाडीलाई खेलस्थलमा प्राथमिक स्वास्थ्य सेवा प्रदान गरिँदै आइरहेको छ । प्रतियोगितास्थलमा नै प्रतियोगिता हेरेर स्वास्थ्य सेवा प्रदान गरिएको प्रदेश नं– ५ का प्रदेश खेलकूद विकास समितिका अध्यक्ष भीम वलीले जानकारी दिनुभयो ।नेपालगञ्जमा भइरहेका ११ खेलस्थलमा नै प्राथमिक स्वास्थ्य उपचारको व्यवस्था गरिएको छ । प्रतियोगितका लागि महेन्द्र रङ्गशालामा चिकित्सकसहितको स्वास्थ्य शिविर राखिएको छ । उहाँका अनुसार नेपालगञ्ज जस्तो गर्मी ठाउँमा खेलाडी अस्वस्थ नहुन् भन्नाका लागि बिहान र बेलुका खेल खेलाइएको छ ।उहाँले अहिलेसम्म गर्मीका कारण कुनै खेलाडी अस्वस्थ नभएको बताउनुभयो । प्रतियोगिताअन्तर्गत बाँकेमा पुरुष फुटबल, बक्सिङ, भलिबल, टेबलटेनिस, उसु, जुडो, ह्याडबल, कराँते, हक्की, सुटिङ, जिम्न्याष्टिक, साइक्लिङ, आर्चरी, फेन्सिङ, पौडी, एथलेटिक्स र पुरुष क्रिकेटका खेल हुँदैछन ।

खेलको अवस्था हेरेर चिकित्सकदेखि स्वास्थ्य सहायकसम्मको टोली खटाइएको स्वास्थ्य उपसमितिका सचिव तिलक नेपालीले जानकारी दिनुभयो । उहाँले खेलस्थलमा प्राथमिक उपचार सम्भव नभएमा थप उपचारका लागि भेरी अञ्चल अस्पतालमा तीन चिकित्सकको नेतृत्वमा अलग्गै टोली समेत रहेको छ ।“अहिलेसम्म खेलकूदमा खेलाडीलाई यस्तो ठूलो उपचार गर्नुपरेको छैन” उहाँले भन्नुभयो, “खेलको प्रकृतिअनुसार अलिअलि खेलाडीलाई चोटपटक लाग्ने गरेको छ । ति चोटपटकलाई खेलस्थलमा भएका टोलीले उपचार गरिरहेका छन ।” उहाँका अनुसार खेल अवधिभर करीब १५ चिकित्सक, ४५ स्वास्थ्य सहायक, स्टार्फ नर्स र अहेव, ५० स्वमयसेवक र पाँच फिजियोथेरापिस्ट खेलाडीको स्वास्थ्य उपचारमा खटिएका छन । अहिलेसम्म ७० जनाले स्वास्थ्य शिविरमा उपचार गराइसकेका छन । तर खेलाडीले सामान्य खालका उच्चरक्तचाप, कब्जियतका औषधिमात्र प्रयोग गर्ने गरेको स्वास्थ्य उपसमितिका सचिव नेपालीले जानकारी गराउनुभयो ।

प्रतियोगिताका लागि राष्ट्रिय खेलकुद परिषद (राखेप)को स्वास्थ्य टोलीमा तीन चिकित्सक आएका छन भने आवश्यकतानुसार नेपालगञ्जमा अन्य चिकित्सकको व्यवस्था गरिएको छ । प्रतियोगितामा खेलाडीलाई चोटपटक लागेमा वा शरीरको कुनै भाग दुखेमा फिजियोथेरापी टोलीसमेत खटाइएको छ । पाँच जनाको टोलीले महेन्द्र रङ्गशालामा खेलाडीलाई दैनिक फिजियोथेरापी गराउने गरेको स्वास्थ्य उपसमितिका सचिव नेपालीले जानकारी गराउनुभयो ।प्रतियोगितामा सात प्रदेश, नेपाली सेना, शसस्त्र प्रहरी, नेपाल प्रहरी र गैरनेपाली आवासिय सङ्घ (एनआरएनए) गरी ११ टोलीका करीब पाँच हजार खेलाडी सहभागी छन । नेपालगञ्जसहित बर्दिया, दाङ, कपिलवस्तु, रुपन्देही र केही प्रतियोगिता काठमाडौँ, ललितपुर र पोखरामा भइरहेका छन् ।  (रासस)

बाँके, ८ वैशाख : आठौँ राष्ट्रिय खेलकूद प्रतियोगिताअन्तर्गत आजदेखि हुने ‘स्वीमिङ’ खेल निजी पौडी पोखरीमा हुने भएको छ । नेपालगञ्ज रङ्गशाला परिसरमा निर्माणाधीन स्वीमिङ पुल तयार नभएपछि होटल सिग्नेट इन कृष्णाको पौडी पोखरीमा हुने भएको छ । प्रदेश खेलकूद विकास समिति प्रदेश नं ५ का अध्यक्ष भीम वलीले शुरुआती चरणका खेलहरु होटल सिग्नेट इन कृष्णाको पौडी पोखरीमा गरिने बताउनुभयो ।उहाँले भन्नुभयो, “यहाँ हामीले आजैदेखि पानी भर्न शुरु गर्दैछौँ, शुरुआती चरणका खेलहरु कृष्णाको पौडी पोखरीमा हुनेछन् ।” अध्यक्ष वलीका अनुसार फाइनल खेल आफ्नै पौडी पोखरीमा सञ्चालन हुनेछ । नेपालगञ्ज उपमहानगरपालिकाको व्यवस्थापनमा खानेपानी संस्थानले पौडी पोखरीको प्राविधिक जिम्मा लिएको उहाँले बताउनुभयो । उहाँले पानी भर्ने काम बाँकी रहेकाले शुरुआती चरणका खेलबाहिर गर्न लागिएको बताउनुभयो ।

हालसम्म पोखरी निर्माणमा रु १५ करोड रकम खर्च भइसकेको छ । निर्माणाधीन स्वीमिङ पुलमा प्रतियोगिता सञ्चालन गर्न नसकिएको नेपाल पौडी सङ्घका अध्यक्ष अशोक बज्राचार्य बताउनुहुन्छ । उहँँले भन्नुभयो, “प्रतियोगिताका लागि ठाउँ भइसकेको छ । पौडी पोखरी २५ मिटरको हुनुपर्ने मापदण्डअनुसार होटल सिग्नेटको पौडी पोखरी छनौट गरेका छौँ, आजदेखि खेल सञ्चालन हुनेछन् ।”निर्माणको जिम्मा लिएको निकाय र प्रतियोगिता आयोजकको ढिलासुस्ती र लापरवाहीले पूर्वाधार समयमै नबनेको उहाँको भनाइ छ । नौ वर्षअघि शिलान्यास भएको पौडी पोखरी तत्कालीन राष्ट्रिय खेलकूद परिषद्को सदस्य सचिव युवराज लामाका पालामा निर्माण कार्य शुरु गरिएको थियो ।

बाँके जिल्ला पौडी सङ्घ अध्यक्ष गोबद्र्धन सिंह सम्झनाले राखेपको लापरवाहीका कारण समयमै पोखरी निर्माणको काम नसकिएको बताउनुभयो । उहाँले भन्नुभयो, “जब प्रतियोगिता नजिकिन्छ अनि हतारमा काम गर्ने नेपालीको चलन नै भइसक्यो । राखेपकै लापारवाहीका कारण समयमै पौडी पोखरी बन्न नसकेको हो ।”प्रतियोगिताका लागि पौडी पोखरी निर्माण सम्पन्न गर्न लापारवाही गरी प्रतियोगिता निजी होटलमा गर्ने तयारी गरिएको भन्दै नागरिकले राखेपको आलोचना गरेका छन् । “नौ वर्षसम्म के हेरेर बसेका थिए, खेल पदाधिकारीहरु ?” नेपालगञ्ज–१९ का श्याम गिरीले भन्नुभयो, “आठौँ होइन पहिले नै तयार हुनुपर्ने पोखरी निर्माणमा लापारवाही भयो । एक वर्षअघि खनेको पोखरीमा भ्यागुताले खेले । अहिले निजी पोखरीमा प्रतियोगिता गराउनुपर्ने अवस्था आयो ।”  (रासस)

बाँके, ८ वैशाख  : तराईमा गर्मीले तताउँदै गएको छ । बिहानीको घामको झुल्कोसँगै गर्मी बढ्दै जान्छ, दिउँसोसम्म पुग्दा ३५ डिग्री सेल्सियसको हाराहारीमा पुग्छ । यही बेला नेपालगञ्जलाई केन्द्र बनाएर आठौँ राष्ट्रिय खेलकूद चलिरहेको छ ।खेलकूदको रौनकले बेग्लै रङ लिएर देशको वातावरणलाई तरङ्गित तुल्याइरहेको छ । खेलाडी खेलिरहेका छन्, प्रशिक्षक खेलाइरहेका छन्, आयोजक खेल महोत्सव आयोजनामा रमाइरहेका छन् र दर्शक जता मन लाग्यो उतैतिर आफूलाई पु¥याइरहेका छन् ।परिवेश खेलकूदमय छ, कतै फुटबल, कतै क्रिकेट, कतै जुडो, कराँते, तेक्वान्दो वा उसु, कतै भलिबल धेरै खेल उमेरअनुसार पनि खेल्ने गरिन्छ । तर प्रदेश प्रहरी तालीम केन्द्र नेपालगञ्जमा चलिरहेको आर्चरी प्रतियोगिताभित्रको रहस्य भने अलि फरक छ ।जहाँ १२ वर्षीय अनुष्का शेरचनदेखि ७० वर्षीय रामप्रसाद राईले खेलिरहेका छन् । पोखरा महानगरपालिका–४ रानीपौवाकी अनुष्का कक्षा ७ मा भर्खरै उत्तीर्ण भएकी छन् । उनी आठ प्रतिस्पर्धीलाई उछिन्दै राष्ट्रिय प्रतियोगितामा सहभागी भएकी हुन् ।

त्यसो त उनको परिवार नै खेल क्षेत्रमा कतै न कतै आबद्ध छ । बुबा योगेन्द्र शेरचन आर्चरी खेलकै प्रशिक्षक हुन् । योगेन्द्रले धेरै पटक ओलम्पिकमा टिम प्रशिक्षकको भूमिका निर्वाह गरिसकेका छन् भने फुपु शान्ति शेरचन पाँचौँ राष्ट्रिय खेलकूदमा स्वर्ण पदक विजेता तथा ११ औँ ओलम्पिककी उच्च स्कोरर हुन् ।उनका दाजू अनिप शेरचन पनि आर्चरी तथा कराँतेका खेलाडी हुन् । यही पारिवारिक पृष्ठभूमिबाट आएकी अनुष्का १० वर्षको उमेरदेखि नै आर्चरी खेलतर्फ मोडिइन् । १२ वर्षको कलिलो उमेरमै राष्ट्रिय खेलकूदमा भाग लिने अवसर पाइन् । आफूभन्दा अग्रज र खारिएका खेलाडीसँग अनुष्काले प्रतिस्पर्धा गरिरहेकी छन् । छयानब्बे प्रतिस्पर्धीका बीचमा एउटा बालिकाले तीर प्रहार गरिरहँदा दर्शकले अचम्म मान्दै चासोका साथ हेरिरहन्छन् । आफूभन्दा निकै अग्रजसँग प्रतिस्पर्धा उनका लागि चुनौतीपूर्ण छ ।उनी भन्छिन्, “खेल जितिहाल्छु भन्ने त लागेको छैन । तर आफूभन्दा योग्य, अग्रज र अनुभवी खेलाडीसँग खेल्न पाउँदा धेरै कुराहरु सिक्ने अवसर पाइरहेकी छु ।” आर्चरीमै ओलम्पियन बन्ने उनको धोको छ । “१३ औँ सागमा पनि भाग लिन्छु”, अनुष्का भन्छिन्, “आर्चरी मेरो जीवन भइसक्यो । आर्चरीमै रमाउँछु ।”

अनुष्का प्रतिस्पर्धीमध्येकी सबैभन्दा कान्छी हुन् । तर त्यही प्रतियोगितामा ७० वर्षीय रामप्रसाद राईले पनि भाग लिएका छन् । विसं २००६ मा जन्मिएका उनी विसं २०१८ मा बेलायती सेनामा भर्ना भए । त्यहाँ रहँदा उनले अन्य खेलहरु खेले पनि आर्चरी भने कहिल्यै खेलेनन् ।विसं २०५६ मा बेलायती सेनाबाट अवकास पाएका राई त्यसपछि विभिन्न समाजिक सङ्घसंस्थामा क्रियाशील रहे । बुढ्यौलीले छोप्दै जाँदा आफूलाई स्वस्थ राख्न कुनै खेल खेल्नुपर्छ भन्ने सोचेर उनी आर्चरी खेल खेल्न थाले । उनी भन्छन्, “यसमा अन्य खेलजस्तो दौडधुप गर्नुपर्दैन ।”छ वर्षदेखि नियमितरुपमा आर्चरी खेलिरहेका राईले सातौँ राष्ट्रिय खेलकूदमा देशभरबाट पाचौँ स्थान हासिल गरेको सुनाउँदै भने, “बुढेसकालमा सहजै खेल्न सकिने भएकै कारण मैले यो खेल खेलिरहेको छु । मलाई १३ औँ सागमा पनि भाग लिने धोको छ ।”नेपाल आर्चरी सङ्घका अध्यक्ष दीपकराज गुरुङ यो खेलमा उमेरको कुनै हद नहुने बताउनुहुन्छ । उहाँले भन्नुभयो, “आर्चरीलाई थप व्यावसायिक बनाउँदै र खेलाडीलाई खेलप्रतिको जिम्मेवारी बढाएर पदक भित्र्याउन हामी लागि परेका छौँ ।”

सङ्घले सबै प्रदेशमा खेलाडी उत्पादन गर्ने योजना बनाएको गुरुङको भनाइ छ । “आर्चरी खेलको प्रवद्र्धन र विकासका लागि खेलमा देखिएको सहभागिताले हामीलाई थप उत्साहित बनाएको छ । बालिकादेखि वृद्धसम्मको उपस्थिति झनै महत्वपूर्ण छ । हामीलाई यसले थप हौसला दिएको छ ।”उहाँले बालिकादेखि वृद्धसम्मको सहभागिताले अन्य खेलाडीको मनोबल पनि बढाएको बताउनुभयो । उहाँ भन्नुहुन्छ, “यहाँको सहभागिताले खेलाडीमा उत्साह बढाएको छ ।” नेपालमा आर्चरीको शुरुआत विसं २०४४ देखि नै भए पनि भर्खरैमात्र गति लिन थालेको हो ।खेल्ने ठाउँको अभाव, प्राविधिक जनशक्तिको अभाव, राज्यको न्यून लगानी आदि कारण नेपालले प्रशस्त सम्भावना भए पनि सम्भावित सफलता निकाल्न नसकेको अध्यक्ष गुरुङको भनाइ छ । उहाँले भन्नुभयो, “विगतको नेतृत्वले चासो दिएन, अहिले बामे सर्ने अवस्थामा आएको छ ।”  (रासस)

काठमाडौं । क्रिष्टियानो रोनाल्डोको टिम युभेन्टसले इटालियन सिरी एको उपाधि जितेको छ । फिओरेन्टिनालाई २–१ ले हराउँदै युभेन्टसले पाँच खेल अगावै यो सिजनको इटालियन सिरी ‘ए’ को च्याम्पियन बनेको हो ।शनिबार फिओरेन्टिना विरुद्धको खेलमा एलेक्स सान्द्रोको गोल र जर्मन पेजेल्लाको आत्मघाती गोल युभेन्टसलाई लगातार आठौं सिरी ए उपाधि जिताउन पर्याप्त बन्यो । फिओरेन्टिनाले सुरूवातमा अग्रता लिएको थियो ।

युभेन्टसको मैदानमा भएको खेलको छैटौँ मिनेटमा निकोला मिलेनकोभिचले गोल गर्दै फिओरेन्टिनालाई अग्रता दिलाएका थिए ।३७औं निेटमा एलेक्स सान्द्रोले गोल गर्दै खेल बराबरीमा र्पुयाए । ५३औं मिनेटमा जर्मन पेजेल्लाले आत्मघाती गोल गरेपछि युभेन्टसले २–१ को अग्रता लियो । फिओरेन्टिनाविरुद्धको जितसँगै युभेन्टसले पाँच खेल अगावै लिग जितेको हो ।

युभेन्टसले ३३ खेलबाट ८७ अंक जोडेको छ । जुन दोस्रो स्थानको नापोलीको भन्दा २० अंकले बढी हो । अब बाँकी ५ खेलमा हार व्यहोरे पनि युभेन्टस पछि पर्ने छैन ।

काठमाडौं । इण्डियन प्रिमियर लिग (आइपीएल) क्रिकेटमा सन्दीप लामिछाने आवद्ध दिल्ली क्यापिटल्सले शानदार जित निकालेको छ । शनिबार राति भएको खेलमा दिल्लीले किङ्स इलाभेन पन्जाबलाई ५ विकेटले पराजित गरेको हो । पन्जाबले दिएको १६४ रनको लक्ष्य दिल्लीले १९ ओभर ४ बलमा ५ विकेट गुमाएर पुरा गर्यो । दिल्लीका लागि शिखर धवन र श्रेयस आयरले अर्धशतक प्रहार गरे । धवनले ५६ तथा आयरले अविजित ५८ रन बनाए ।

टस हारेर पहिले ब्याटिङ गरेको पन्जाबले पुरै २० ओभर खेल्दै ७ विकेट गुमाएर १६३ रन बनाएको थियो । पन्जाबका लागि क्रिस गेलले ६९ रनको अर्धशतकीय इनिङ्स खेलेपनि आफ्नो टिमलाई जिताउन सकेनन् ।

पन्जाबविरुद्ध सन्दीपले ४० रन खर्चेर ३ विकेट लिए । दिल्लीले १० खेलमा ६ जितसहित १२ अंकका साथ तेस्रो स्थानमा रहेको छ ।

काठमाडौं । युभेन्टस च्याम्पियन्स लिगबाट बाहिरिनु र बार्सिलोना अन्तिम चारमा पुग्नुले सन् २०१९ को बालोन डी’ओरमा मेस्सीलाई फाइदा पुगेको प्रशिक्षक जोसे मोरिन्होले बताएका छन् । उनी म्यानचेस्टर युनाइटेडबाट बर्खास्त भएपछि अहिले खाली छन् । क्रिष्टियानो रोनाल्डोको गोलको बाबजुद इटालियन क्लब युभेन्टस डच क्लब अजाक्ससँग पराजित हुँदै अन्तिम ८ बाटै बाहिरियो । तर मेस्सीको गोलमा बार्सिलोनाले म्यानचेस्टर युनाइटेडलाई हराएर सेमिफाइनलमा स्थान बनाएको छ ।

रुसी टेलिभिजनसँग जोसेले भनेका छन्, ‘मेस्सीको स्थान बुझ्न सहज छ, तर उनलाई नियन्त्रणमा राख्न पिँजडा बनाउनु सजिलो छैन ।’ उनले अघि भने, ‘जब मेस्सीसँग बल हुन्छ र अवस्था वान अन वान हुन्छ भने उनलाई रोक्न सकिँदैन । मेस्सीलाई रोक्नका लागि उनी वरिपरि पिँजडा बनाउनु पर्छ ।’

मेस्सीको यो सिजन निकै उत्कृष्ट रहेको र युभेन्टस तथा क्रिष्टियानो रोनाल्डो मैदानबाट बाहिरिएकाले अब बालोन डी’ओरले पर्खिरहेको छ भन्ने मेस्सीलाई थाहा रहेको जोसेले बताएका छन् । बार्सिलोना र अजाक्ससँग लिभरपुल र टोटनह्याम च्याम्पियन्स लिगको सेमिफाइनलमा पुगेका छन् ।

काठमाडौं । नेपाल सरकारले इन्टरनेटमा खेलिने पब्जी खेलमा प्रतिबन्ध लगाएको छ । युवा तथा बालबालिकाहरुमा नकारात्मक असर पारेको भन्दै सरकारले इन्टरनेट प्रदायक कम्पनीलाई पब्जी गेम बन्द गर्न निर्देशन दिएको थियो दूरसञ्चार प्राधिकरणले इन्टरनेट प्रदायक कम्पनीहरुलाई पब्जी गेम बन्द गर्न निर्देशन दिएको हो ।

बालबालिका तथा युवा वर्ग पब्जी गेम व्यस्त हुँदा उनीहरुको सृजनशीलतामा ह्रास, हिंस्रक बनाउने तथा मानसिक र शारीरिक समस्या देखापर्न सक्ने भन्दै चिन्ता जनाइएका बेला सरकारले पब्जी गेममा प्रतिबन्ध लगाउनु उचित कि अनुचित ? यसबारे आम मानिससँग राखिएको जिज्ञासामा मिश्रित प्रतिक्रिया आएको छ । थप यस भिडियोमा

दाङ, ६ वैशाख : युवा तथा खेलकुद मन्त्री जगतबहादुर विश्वकर्माले खेलकूदको विकासका लागि भौतिक पूर्वाधारमा जोड दिइने बताउनुभएको छ । आठाँै राष्ट्रिय खेलकूद प्रतियोगिताअन्तर्गत आज तुलसीपुरमा कराते प्रतियोगिताको उद्घाटन गर्दै मन्त्री विश्वकर्माले उत्साहका साथ खेलमा सहभागी हुन सबै खेलाडीलाई आग्रह गर्नुभयो । उहाँले कराते प्रतियोगिताका लागि आवश्यक भौतिक पूर्वाधार निर्माणको काम अधुरो भएकामा दुःख व्यक्त गर्नुभयो ।

“मन्त्रालयले निर्माण कार्यलाई छिट्टै पूर्णता दिनेछ”, मन्त्री विश्वकर्माले भन्नुभयो । प्रदेश ५ मा राष्ट्रिय खेलकूद प्रतियोगिता आयोजना गरेर भौतिक पूर्वाधार निर्माण गरिनु सकारात्मक कुरा भएको उहाँको भनाइ थियो ।प्रतियोगिताअन्तर्गत कराते खेल शनिबार बिहान ८ बजेदेखि शुरु हुने आयोजकले जनाएको छ । उक्त प्रतियोगितामा सातवटै प्रदेश, तीन विभागीय टोली र एनआरएनका खेलाडीबीच प्रतिस्पर्धा हुनेछ । (रासस)

घोराही, ६ वैशाख : आठौँ राष्ट्रिय खेलकूद प्रतियोगिताअन्तर्गत दाङको बेलझुण्डी रङ्गशालामा महिला फुटबल चलिरहेको छ । यही वैशाख ४ गतेदेखि शुरु भएको महिला फुटबलअन्तर्गत आज बिहान भएको खेलमा नेपाल प्रहरीकी निरु थापाले ह्याट्रिक गर्नुभएको छ ।

बिहान प्रदेश नं ५ र नेपाल प्रहरीबीच भएको खेलमा जर्सी नम्बर १४ की थापाले लगातार तीन गोल गर्नुभएको हो । यस्तै महिला फुटबलमा नेपाल प्रहरीकै जर्सी नम्बर ५ की अमृत जैसीले दुई गोल र जर्सी नम्बर ७ की निर्मला थापाले एक गोल गर्नुभएको छ । खेलमा ६–०ले नेपाल पुलिस विजयी भएको छ । प्रदेश ५ ले एउटा पनि गोल गर्न सकेन । अपराह्न ३ बजेदेखि प्रदेश २ र प्रदेश ३ बीच खेल चलेको जिल्ला फुटबलसँग दाङका अध्यक्ष सुशील श्रेष्ठले जानकारी दिनुभयो । (रासस)

बेझाड, ६ वैशाख : कालीगण्डकीको अस्तित्व बचाउन र पर्यटन विकासका लागि पाल्पाको राम्दी मालुङ्गाघाटदेखि पुट्टारघाटसम्म जलयात्रा हुँदैछ । नेपाल पर्यटन बोर्डको प्रवद्र्धनमा पाल्पाको रामपुर नगरपालिकाको आयोजना तथा रम्भा गाउँपालिका, स्याङजाको चापाकोट नगरपालिका, तनहुँको घिरिङ गाउँपालिकाको सहआयोजनामा जलयात्रा आयोजना गरिएको हो ।निजी सङ्घ संस्थाद्वारा यसभन्दा अगाडि कालीगण्डकीमा जलयात्रा निकालिए पनि सरकारी तवरबाट भने पहिलो पटक हुन लागेको हो । जलयात्रामा करीब १५० सहभागी हुने बताइएको छ ।आज पाल्पा र स्याङजाको सिमाना राम्दी मालुङ्गादेखि भुजात सिद्धबाबासम्म र शनिबार भुजात सिद्धबाबादेखि पुट्टारघाटसम्म जलयात्रा निकालिने भएको छ । कालीगण्डकीको गरिमा बचाउँदै यस नदीलाई पर्यटन विकास गरी विश्वसामु चिनाउन जलयात्रा गर्न लागिएको रामपुर नगरपालिकाका प्रमुख रमणबहादुर थापाले बताउनुभयो ।

राम्दी मालुङ्गादेखि पुट्टारघाटसम्म हुने जलयात्रामा १८ देखि २० वटा याफ्टिङ डुङ्गा एकैसाथ सञ्चालनमा ल्याइने नगरप्रमुख थापाले बताउनुभयो । कालीगण्डकीको तल्लो भाग राम्दीदेखि देवघाटसम्म नियमित याफ्टिङ चलाउन कर्णाली याफ्टिङ एण्ड एड्भेन्चरका विज्ञसहितको टोलीले कालीगण्डकीमा यसभन्दा अगाडि सफल परीक्षण गरिसकेका छन् ।आज राम्दीको मालुङ्गाधामदेखि भुजात सिद्धबाबासम्म जलयात्रा हुने र आजै अपराह्न भुजात सिद्धबाबामा आएर समापन कार्यक्रम हुनेछ । दोस्रो दिन शनिबार भुजात सिद्धबाबादेखि पुट्टारघाटसम्म जलयात्रा हुनेछ ।सन् २०२० मा २० लाख पर्यटक नेपाल भित्र्याउने सरकारको लक्ष्य रहेकाले पनि पर्यटन विकास गर्न कालीगण्डकीमा जलयात्रा गर्न लागिएको नगरपालिकाका उपप्रमुख विष्णुदेवी घिमिरे आचार्यले बताउनुभयो ।

कालीगण्डकी उपत्यकालाई नयाँ पर्यटकीय गन्तव्यका रुपमा विकास गर्ने, नियमित जलयात्रा गरी रोजगारीबाट आयआर्जन बढाउने, विश्वभर कालीगण्डकीलाई चिनाउने, नदी र जीवनको महत्व जोडिने भएको हुँदा यसको उपयोग गरी आम्दानी गर्ने बाटो सिर्जना गर्ने उद्देश्यले जलयात्रा गर्न लागेको कालीगण्डकी उपत्यका विकास समितिका अध्यक्ष शान्ताबहादुर श्रेष्ठले बताउनुभयो ।जलयात्राका लागि करीब रु १५ लाख जति रकम खर्च हुने अनुमान गरिएको छ । कालीगण्डकीलाई पारिवारिक तथा धार्मिक पर्यटनका लागि जलयात्रा अति उत्तम मानिन्छ । कर्णाली प्रदेशमा भएको तेस्रो नदी शिखर सम्मेलनले पनि अबको दुई वर्ष भित्रमा कालीगण्डकीमा चौथो नदी महोत्सव आयोजना गर्ने घोषणा पत्रमा उल्लेख गरेको छ ।शालिग्राम पाइने नदीका नामले समेत प्रख्यात यस नदीमा नियमित जलयात्रा गरेर आम्दानीको स्रोत प्रशस्त लिन सकिने सम्भावना रहेको रामपुर उद्योग वाणिज्य सङ्घका अध्यक्ष भोजेन्द्रप्रकाश ढकालले बताउनुभयो । तीन महीनाअघि रामपुर उद्योग वाणिज्य सङ्घको आयोजनामा चलेको दोस्रो रामपुर महोत्सवका अवसरमा निकालिएको जलयात्राको परीक्षण सफल भएपछि पुनः नदीको महत्वलाई बचाइ राख्न र कालीगण्डकी बेँसी क्षेत्रको पर्यटन विकासका लागि जलयात्रा गरिने भएको हो । (रासस)

काठमाडौँ, ५ वैशाख : आगामी वर्ष दक्षिण अफ्रिकामा आयोजना हुने आइसिसी उन्नाइस वर्षमुनि (यु–१९) एकदिवसीय विश्वकप क्रिकेट खेल्ने नेपालको सपना अधुरो भएको छ ।मलेसियामा जारी एशिया छनोटअन्तर्गत आज भएको खेलमा संयुक्त अरब इमिरेट्स (युएई)ले ओमानलाई १० विकेटले पराजित गरेपछि नेपालको विश्वकप खेल्ने सपनामा पूर्णविराम लागेको हो ।छनोट खेलमा सिङ्गापुरविरुद्धको पहिलो खेलबाट राम्रो शुरुआत गरेको नेपालका लागि युएईविरुद्धको दोस्रो खेलमा हार बेहोर्नु नै विश्वकप खेल्न नपाउनुका प्रमुख कारण बन्न पुग्यो । वर्षाका कारण खेल सम्भव नभएपछि वकवर्थ नियमका आधारमा नेपाल एक रनको झिनो अन्तरले युएईसँग पराजित भएको थियो । जसको नतिजाबाट नेपालको विश्वकप खेल्ने सपना अधुरो नै रह्यो ।

नेपालले पहिलो खेलमा सिङ्गापुरलाई २१७ रनको भारी अन्तरले पराजित गरेको थियो भने मलेसियालाई आठ तथा ओमनलाई १५० रनले पराजित गरेको थियो । जारी खेलमा नेपालले कुवेतलाई पराजित गरे पनि नेपाल विश्वकपमा सहभागिता जनाउन पाउने छैन । विश्वकपमा छनोट हुन नेपाललाई कुवेतविरुद्ध जित र युएईको हार आवश्यकता रहेको थियो तर, युएईको जितसँगै नेपालको विश्वकप खेल्ने सपना समाप्त भएको हो ।  उक्त छनोट प्रतियोगिताको शीर्ष एक टोलीले मात्र विश्वकपमा स्थान बनाउने प्रावधान छ । जसमा युएई प्रवेश गर्न सफल भयो । यसअघि सात पटक विश्वकप खेलिसकेको नेपाल आठौँ पटक प्रवेशका लागि युएईसँगको खेल घातक सावित भयो । जितसँगै युएईले अब सन् २०२० मा दक्षिण अफ्रिकामा आयोजना हुने विश्वकपमा सहभागिता जनाउनेछ । (रासस)

लमही, ५ वैशाख : आठौँ राष्ट्रिय खेलकूदअन्तर्गत आजदेखि दाङको बेलझुण्डी रङ्गशालामा एथ्लेटिक्स शुरु भएको छ ।बेलझुण्डी रङ्गशालाको सेन्थेटिक ट्रयाकमा शुरु भएको एथ्लेटिक्सअन्तर्गत १०० मिटर महिला र पुरुष, दश हजार मिटर महिला पुरुष र सटपुट खेल भएको छ । १०० मिटर दौडमा महिलातर्फ नेपाल आर्मीका सरस्वती चौधरीले स्वर्ण पदक जितेका थिए ।उनले १२ मिनेट १९ सेकेण्डमा सो दूरी पूरा गर्दै स्वर्ण पदक जितेकी हुन् । यसैगरी प्रदेश पाँचकी जयरानी चौधरीले १२ मिनेट १९ सेकेण्डका साथ रजत पदक जित्दा आर्मीकै कृष्णा चौधरी १२ मिनेट ५२ सेकेण्डका साथ कास्य पदक जित्न सफल भइन् ।यसैगरी १०० मिटर पुरुष दौडमा एपिएफका आशिष चौधरीले स्वर्ण पदक जिते । उनले ११ सेकेण्डमा दूरी पूरा गरेका थिए । कर्णाली प्रदेशका यमसाजन सुनारले ११ दशमलब १० सेकेण्डका साथ रजत पदक हात पार्न सफल भएका थिए भने आर्मीका आनन्ददेव चौधरीले ११ दशमलव १५ सेकेण्डका साथ कास्य पदक हात पार्न सफल भए ।

१० हजार मिटर महिला प्रतिष्पर्धामा नेपाल आर्मीकी विश्वरुपा बुढाले स्वर्ण पदक जित्न सफल भइन् । दोस्रो स्थानमा रहेकी नेपाल पुलिसकी राजपुरा पछाईंसँग समय भने समान रहेको थियो । पहिलो र दोस्रो स्थानमा रहने विश्वरुपा र राजपुराले ३७ मिनेट ३० दशमलव नौ सेकेण्ड रहेको थियो ।यस्तै प्रदेश नं ३ की सन्तोषी श्रेष्ठ ३७ मिनेट ५० दशमलव छ सेकेण्डका साथ कास्य पदक जितिन् । १० हजार मिटर पुरुष दौडमा कर्णाली प्रदेशका दुर्गा बुढाले स्वर्ण पदक जितेका छन् । उनले ३१ मिनेट ०३ दशमलव एक सेकेण्डमा दूरी पूरा गरेका छन् । गण्डकी प्रदेशका अनिष थापाले ३१ मिनेट ९ दशमलव ८ सेकेण्डका साथ रजत पदक जितेका थिए भने एपिएफका गोपीचन्द्र पार्कीले ३१ मिनेट ५८ दशमलव तीन सेकेण्डका साथ कास्य पदक जिते ।

सटपुटतर्फ पुरुषमा आर्मीका टङ्कप्रसाद दाहालले स्वर्ण पदक जितेका छन् । उनले १२ मिटर १९ सेन्टिमिटरका साथ स्वर्ण पदक जित्दा १२ मिटर ०४ सेन्टिमिटरका साथ नेपाल पुलिसका पुष्कल शर्माले रजत पदक जिते । यसैगरी आर्मीकै चित्रबहादुर वलीले ११ मिटर ८५ सेन्टिमिटरका साथ कास्य पदक जितेका छन् ।त्यस्तै महिला सटपुटमा नेपाल पुलिसकी चन्द्रकला लामगादेले स्वर्ण पदक जितिन् । उनले १२ दशमलव शुन्य चार मिटरमा स्वर्ण पदक जित्दै नयाँ रकेर्ड राख्न सफल भइन् । उनले आफ्नै पुरानो रेकर्ड ११ मिटर ५६ सेन्टिमिटरको रेकर्ड ब्रेक गरेकी हुन् ।यसैगरी प्रदेश ५ की सङ्गीता अधिकारीले रजत तथा नेपाल पुलिसकी वसन्ती चौधरीले कास्य पदक जितिन् ।  (रासस)

काठमाडौँ, ५ वैशाख : राष्ट्रिय खेलकूद परिषद् (राखेप)मा दरबन्दीभन्दा बढी कर्मचारी भर्ना गर्नेदेखि नवीकरण नभएको खेल सङ्घलाई समेत आर्थिक अनुदान उपलब्ध गराइएको पाइएको छ ।महालेखा परीक्षकको कार्यालयले सार्वजनिक गरेको ६५औँ वार्षिक प्रतिवेदनमा नेपालमा खेलकूदको संस्थागत विकास गर्न विसं २०१५ मा राष्ट्रिय स्वास्थ्य तथा खेलकूद परिषद्को नाममा स्थापना भई खेलकूद परिषद् विकास ऐन, २०४८ अन्तर्गत रहेको राखेपभित्र यस्तो बेथिति मौलाएको हो ।राष्ट्रिय खेल सङ्घ कार्य सहजीकरण कार्यविधि, २०७० को बुँदा २.३.२ मा समयमा नवीकरण नगराउने सङ्घलाई परिषद्बाट कुनै पनि सुविधा तथा सिफारिस उपलब्ध गरिने छैन भन्ने व्यवस्था भएता पनि आव २०७३÷७४ मा नवीकरण नभएका खेलकूदका सङ्घलाई परिषद्ले रु ६४ लाख अनुदान उपलब्ध गराएको पाइएको छ ।

यसैगरी परिषद्मा अर्थमन्त्रालयबाट २०६१ वैशाख २५ गते प्राप्त पत्रानुसार ७५० जना स्थायी र २५० जना करारसमेत एक हजार जना रहने गरी दरबन्दी स्वीकृत भएकोमा आव २०७४÷७५ मा करारतर्पm दरबन्दीभन्दा ९६ जनालाई बढी खर्च गरेकाले दरबन्दीअनुसार मात्र खर्च गर्न निर्देशन दिइएको छ ।परिषद्को कार्यसम्पादन गर्न आवश्यक पर्ने सङ्गठन संरचना र दरबन्दी परिषद्ले निर्धारण गरेबमोजिम हुने र दरबन्दी घटबढ गर्दा अर्थ मन्त्रालयको पूर्वस्वीकृति लिनुपर्ने व्यवस्थालाई परिषद्ले उल्लङ्घन गर्दै दरबन्दीभन्दा बढी कर्मचारी नियुक्त गरेको पाइएको हो ।त्यसैगरी कार्यसम्पादन तथा अनुभवको आधारमा बढुवा भएका १०९ कर्मचारीको समायोजन भएको नदेखिएकाले दरबन्दीअनुसार केन्द्र, क्षेत्र र जिल्लामा कर्मचारी पदस्थापना गर्न तथा साथै शहरी क्षेत्र तथा सुविधा सम्पन्न स्थानमा बढी कर्मचारी केन्द्रित रहेको देखिएको छ ।

त्यसैगरी परिषद्को आर्थिक कार्यविधि नियमावली, २०६४ को नियम ३३ मा वर्षान्तमा खर्च नभई बाँकी रहेको रकम फ्रिज गर्नुपर्ने व्यवस्था छ । नेपाल सरकारबाट सशर्त अनुदानअन्तर्गत निकासा प्राप्त भई परिषद्अन्तर्गत जिल्ला खेलकूद विकास समितिलाई निकासा दिएकोमा जिल्ला खेलकूद विकास समितिबाट खर्च नभई फिर्ता गरेको रु ८५ लाख ४२ हजार रकम परिषद्ले सङ्घीय सञ्चितकोष फिर्ता नगरी समितिको खातामा मौज्दात देखाएको पाइएको छ ।परिषद्मा २०७५ असार मसान्तसम्म रु एक अर्ब १५ करोड ४६ लाख ६७ हजार पेस्की बाँकी रहेकाले उक्त पेस्की असुल फछ्र्योट गर्न थप सक्रिय गर्न परिषद्लाई निर्देशन दिइएको छ ।  (रासस)

राँझा, ५ वैशाख : आठौँ राष्ट्रिय खेलकूदका लागि दाङको बेलझुण्डीमा रङ्गशाला निर्माण भएको भए पनि खेल भने घोराहीमा हुने भएको छ । समयमै निर्माणकार्य पूरा नभएपछि राष्ट्रिय खेलअन्तर्गत महिला फुटबल प्रतियोगिता घोराहीको भरतपुर मैदानमा हुने भएको हो । राखेपले बेलझुण्डी रङ्गशालामा महिला फुटबल प्रतियोगिताको अन्तिम खेल खेलाउने भनी संरचना निर्माण गरे पनि निर्धारित समयसम्म काम पूरा नभएपछि महिला फुटबलका केही खेल घोराहीमा हुनेछन् भने केही बेलझुण्डीमा हुने भएका छन् ।हिजोदेखि राष्ट्रिय खेलकूदअन्तर्गत महिला फुटबल प्रतियोगिता दाङमा शुरु भएको छ । लिगका खेल घोराही र कपिलवस्तुमा हुने भए पनि सेमिफाइनल र फाइनलका खेल भने बेलझुण्डी रङ्गशालामै हुने दाङ जिल्ला खेलकूद विकास समितिका अध्यक्ष डिल्ली डाँगीले बताउनुभयो । अर्कोतर्फ बेलझुण्डी रङ्गशालामा एथलेटिक्सका खेल हुने भएकाले पनि एकैपटक दुई खेल खेलाउन नमिल्ने भएकाले घोराहीमा फुटबल खेल खेलाउन लागिएको उहाँले बताउनुभयो ।

“बेलझुण्डी रङ्गशालामा एथलेटिक्स खेल पनि हुन्छ, त्यसैले हामीले बेलझुण्डीमा एथलेटिक्स खेल खेलाउने छौँ”, उहाँले भन्नुभयो, “फाइनल र सेमिफाइनलको खेल भने बेलझुण्डीमै हुनेछन् ।” उहाँका अनुसार यही वैशाख ७ देखि ११ गतेसम्म हुने सेमीफाइनल र फाइनलका खेल उक्त रङ्गशालामै हुनेछन् । साथै बिहान घोराहीमा खेल हुने र साँझ बेलझुण्डीमै हुने गरी खेल तालिका बनाइएको समेत उहाँले बताउनुभयो । बेलझुण्डी रङ्गशाला निर्माणको काम अझै पूरा हुनसकेको छैन ।फुटबल र एथलेटिक्स खेलका लागि मात्रै संचरना निर्माण भएको भए पनि अन्य संरचना निर्माणको काम भने खेलपछि मात्रै पूरा गर्ने योजना रहेको निर्माण कम्पनीका प्रतिनिधिले बताए । बुधबार राष्ट्रिय खेलअन्तर्गत तीन खेल भएका छन् । यसअघि दाङको घोराहीमा भएको टेबलटेनिस खेल पूरा भइसकेको छ भने बास्केटबल चलिरहेको छ । त्यस्तै आजदेखि कराँते, एथलेटिक्सका खेल शुरु हुनेछन् । (रासस)

राँझा, ५ वैशाख  : आठौँ राष्ट्रिय खेलकूद प्रतियोगितालाई लक्षित गरी बाँकेमा रु ४८ करोडको लगानीमा अत्याधुनिक सुविधासम्पन्न खेलकुद पूर्वाधार निर्माण भएका छन् ।नेपालगञ्जमा अत्याधुनिक र सुविधासम्पन्न फुटबल मैदान, पौडीपोखरी, कभर्डहल, भारोत्तोलन एकेडेमी, सुटिङ रेन्ज, एथलेटिक्स ट्र्याक र जुडो हल निर्माण भएका छन् भने, बाँकेकै कोहलपुरमा अन्तर्राष्ट्रिय क्रिकेट मैदान र खजुरामा भलिबल रङ्गशाला निर्माण भएका छन् ।बाँकेमा सबैभन्दा ठूलो लगानीमा नेपालगञ्ज रङ्गशाला निर्माण भएको छ । रङ्गशालाका लागि मात्रै रु २४ करोड बजेट उपलब्ध भएको छ । रु छ करोड लागतमा फुटबल मैदान र रु १८ करोडमा भीआइपी प्यारापिट निर्माण भइरहेको मध्यपश्चिम क्षेत्रीय खेलकूद विकास समिति प्रदेश नं ५ का अध्यक्ष भीम वलीले बताउनुभयो ।

उहाँका अनुसार, नेपालगञ्ज रङ्गशालामा खेल्नयोग्य मैदानका लागि रु ३६ लाखको बरमुडा दुबो रोपिएको छ । यसले फुटबल मैदान अन्तर्राष्ट्रिय मापदण्डको बनेको छ । रङ्गशाला परिसरमा फुटबल मैदानबाहेक करोडाँैको लगानीमा पौडीपोखरी, सुटिङ रेञ्ज, भारोत्तोलन एकेडेमी निर्माणकार्य भएको छ । रु १४ करोड २८ लाख बजेटमा रङ्गशाला छेउमा पौडी पोखरी निर्माण भएको छ । त्यसैगरी रु एक करोड ५० लाखको लगानीमा सुटिङ रेञ्ज तयारी अवस्थामा पुगेको अध्यक्ष वलीले जानकारी दिनुभयो ।नेपालगञ्जकै कारकाँदोमा रु दुई करोडमा जुडो एकेडेमी निर्माण भएको छ । आठौँ राष्ट्रिय खेलकूद प्रतियोगितालाई लक्षित गरी बाँकेको खजुरा सीतापुरमा रु दुई करोड ५० लाखको लगानीमा भलिबल रङ्गशाला निर्माण भएको छ ।

यसैगरी कोहलपुरमा रु एक करोड ५० लाखको लगानीमा क्रिकेट खेलमैदान तयार भएको छ । यही मैदानमा बुधबारदेखि आठौँ राष्ट्रिय खेलकूद प्रतियोगिताअन्तर्गत क्रिकेट खेल भएको छ । राष्ट्रिय खेलकूद परिषद् (राखेप) का सदस्य सचिव केशवकुमार विष्टले आठौँ राष्ट्रिय खेलकूद प्रतियोगितालाई लक्षित गरेर निर्माणाधीन खेलकूद पूर्वाधारमा नेपालको खेलकूद इतिहासमै सबैभन्दा धेरै लगानी भएको बताउनुहुन्छ । सदस्यसचिव विष्टले नेपालगञ्जको इतिहासमै यति ठूलो लगानीमा पहिलोपटक प्रतियोगिता हुन लागेको प्रतिक्रिया दिनुभयो । उहाँले निर्माणाधीन भौतिक पूर्वाधारको निर्माणकार्य अधिकांश सकिएको बताउनुभयो । “भिआइपी प्यारापिटको निर्माणकार्य पूरा हुँदैछ”, सदस्यसचिव विष्टले रासससँग भन्नुभयो, “पछिल्लो प्रगति देखेर हामी निकै हौसिएका छौँ, प्रतियोगिता गर्न अब पूर्वाधार बाधक छैन, यसमा सबैले साथ दिन जरुरी छ ।” उहाँले खेल प्रतियोगिता आयोजना हुने स्थानको शतप्रतिशत पूर्वाधार निर्माण भइसकेको बताउनुभयो ।  (रासस)

सुर्खेत, ५ वैशाख : यही वैशाख १२ गतेदेखि वीरेन्द्रनगरमा शुरु हुने दोस्रो संस्करणको कर्णाली प्रिमियर लिग (केपिएल–टू) को विजेता टोलीले रु पाँच लाख राशिको पुरस्कार पाउने भएको छ ।आयोजक कर्णाली क्रिकेट एकेडेमीले बुधबार पत्रकार सम्मेलनमार्फत पुरस्कार राशि, मुख्य प्रायोजक र टोली कप्तानको नाम सार्वजनिक गरेको हो । लिग उपविजेताले रु दुई लाख र सर्वोत्कृष्ट खेलाडीले रु ५० हजार हात पार्नेछ । उत्कृष्ट बलर र ब्याट्सम्यानले समान रु २०÷२० हजार पाउँदा प्रत्येक खेलमा उत्कृष्ट प्रदर्शन गर्ने खेलाडीले रु तीन हजार ५०० हात पार्ने आयोजकले जनाएको छ ।प्रतियोगी आठ टोलीका कप्तानको नाम सार्वजनिक गरिएको छ । विनोद भण्डारीको कप्तानीमा नेपाल आर्मी रहनेछ भने मञ्जित श्रेष्ठको कप्तानीमा नेपाल पुलिस क्लब रहँदा सशस्त्र प्रहरीको एपिएफको कप्तानी वसन्त रेग्मीले सम्हाल्नुहुनेछ ।

त्यस्तै, रवीन्द्रजङ्ग शाहीको कप्तानीमा कर्णाली–११ रहनेछ भने मेहबुब आलमको कप्तानीमा लालीगुराँस क्रिकेट क्लब झापा रहेको छ । हिमालयन क्रिकेट एकेडेमी काठमाडाँैको कप्तानमा सुरेन्द्र चन्द, महेन्द्रनगर क्रिकेट क्लबको कप्तान सुशील खड्का रहँदा मध्यपश्चिम क्रिकेट एकेडेमीको कप्तानी अजय साहनीले गर्नुभएको छ ।एकेडेमीका संयोजक रेशम शाहीले प्रतियोगिता हेर्न आउने दर्शकका लागि मोटरसाइकल, एलइडी टेलिभिजनलगायत विभिन्न पुरस्कारको व्यवस्था गरिएको बताउनुभयो । उहाँका अनुसार ‘केपिएल–टू’ को मुख्य प्रायोजकका रुपमा वाइवाई चाउचाउ रहेको छ । कर्णाली प्रिमियर लिग दोस्रो संस्करण वीरेन्द्रनगरस्थित कालुञ्चौक क्रिकेट मैदानमा वैशाख २१ गतेसम्म सञ्चालन हुनेछ । (रासस)

काठमाडौं । इन्डियन प्रिमियर लिग (आइपीएल) क्रिकेट अन्तर्गत बुधबार राति भएको खेलमा कप्तान महेन्द्र सिंह धोनी बिना मैदानमा उत्रिएको चेन्नई सुपर किंग्स पराजित भएको छ । कप्तान धोनीलाई आराम दिइएको खेलमा चेन्नई सनराइजर्स हैदराबादसँग ६ विकेटले पराजित भएको हो ।

चेन्नईले प्रस्तुत गरेको १३३ रनको लक्ष्य घरेलु टोली हैदराबादले १६ ओभर पाँच बलमा चार विकेटको क्षतिमा भेट्टायो । हैदराबादका लागि जोनी बेयरस्टोले ४४ बलमा नटआउट ६१ तथा डेविड वार्नरले २५ बलमा ५० रन बनाए । चेन्नईका इमरान ताहिरले दुई विकेट लिए ।

फिटनेशका कारण धोनीलाई आराम दिइएको खेलमा पहिले ब्याटिङ्ग गरेको चेन्नईले पाँच विकेटको क्षतिमा १३२ रन बनाएको थियो । उसका लागि फाप डु प्लेसिसले ३१ बलमा ४५ तथा शेन वाट्सनले २९ बलमा ३१ रन बनाएका थिए । हैदराबादका रशिद खानले दुई विकेट लिए ।

काठमाडौँ, ४ वैशाख : थाइल्याण्डमा यही वैशाख १३ देखि १७ गतेसम्म आयोजना हुने एशियाली फुटबल महासङ्घ (एएफसी) यू–१९ महिला च्याम्पियनसिप छनोटको दोस्रो चरणको तयारीका लागि नेपाली यू–१९ महिला फुटबल टोली आज चीन प्रस्थान गरेको छ ।चीनमा दुई अभ्यास खेल खेलेपछि नेपाली टोली प्रतियोगिता खेल्न थाइल्याण्ड जाने आज यहाँ आयोजित बिदाई कार्यक्रममा मुख्य प्रशिक्षक हरिओम श्रेष्ठले जानकारी दिनुभयो । सरु लिम्बुको कप्तानीमा रहेको २२ सदस्यीय नेपाली टोलीलाई अखिल नेपाल फुटबल सङ्घ (एन्फा)का अध्यक्ष कर्मा छिरिङ शेर्पालगायत एन्फाका पदाधिकारीले आज बिदाई गर्नुभयो ।थाइल्याण्डमा दोस्रो चरणको छनोट यही वैशाख १३ देखि १७ गतेसम्म सञ्चालन हुनेछ । नेपालले समूह चरणमा अष्ट्रेलिया, उज्वेकिस्तान र म्यानमासँग खेल्नेछ । नेपाली टोलीमा गोलकिपर अन्जना रानामगर, रेविका राई, उषा नाथ, डिफेण्डरमा निशा थोकर, सुष्मा महर्जन, रोजिना श्रेष्ठ, समीक्षा घिमिरे, विमला विक, पुजा रानामगर, सलोनी रानामगर, सविता रानामगर, मिडफिल्डरमा सरु लिम्बू, मन्जली कुमारी योञ्जन, मेनुका आले मगर, अस्मिता बैद्य, मनिषा राउत, सुहानी कुशुवार, प्रीति राई, सम्झना लावती र स्ट्राइकरमा रश्मीकुमारी घिसिङ, एलिशा जिम्बा, रेखा पौडेल तथा निर्मला उपाध्याय छन् ।

एन्फाले उक्त प्रतियोगितामा सहभागी हुने टोलीको मङ्गलबार घोषणा गरेको थियो । यसअघि थाइल्याण्डमा भएको पहिलो चरणमा उत्कृष्ट प्रदर्शन गर्दै नेपाल दोस्रो चरणमा प्रवेश गरेको थियो । गत कात्तिक दोस्रो साता थाइल्याण्डको चोनबुरीमा भएको प्रतियोगितामा नेपालले तीन खेलबाट ६ अङ्क बनाउँदै दोस्रो चरणमा स्थान बनाएको थियो ।पहिलो खेलमा आयोजक थाइल्याण्डसँग ४–० गोलले पराजित नेपालले दोस्रो खेलमा भारतलाई २–० गोलले पराजित गरेको थियो । भारतबिरुद्ध दुबै गोल रेखा पौडेलले गरेकी थिइन् । प्रतियोगिताको अन्तिम खेलमा नेपालले पाकिस्तानलाई ९–० गोलले पराजित गरेको थियो । दोस्रो चरणका खेल यही वैशाख १३ देखि १७ गतेसम्म थाइलाण्डमै हुनेछन् । छनोटको शीर्ष टोलीले एएफसी यू–१९ च्याम्पियनसिपमा स्थान बनाउने छ । छनोटको समूह ‘ए’ मा रहेको नेपालले अष्ट्रेलिया, उज्वेकिस्तान र म्यानमासँग खेल्नेछ । नेपालले पहिलो खेल वैशाख १३ गते अष्ट्रेलियासँग, १५ गते उज्वेकिस्तान तथा १७ गते म्यानमासँग खेल्नेछ । (रासस)

काठमाडौँ, ४ बैशाख : थाइल्याण्डमा आयोजना हुने एसीसी सोह्र वर्षमुनि (यु–१६) पूर्वी क्षेत्रीय क्रिकेट प्रतियोगिताका लागि आज १४ सदस्यीय नेपाली क्रिकेट टोलीको घोषणा भएको छ । यही वैशाख ७ देखि १५ गतेसम्म हुने उक्त प्रतियोगिताको लागि विशाल विक्रम केसीको कप्तानीमा १४ सदस्यीय टोलीको घोषणा गरिएको हो । टोलीमा अन्य चार वैकल्पिक खेलाडीसमेत चयन भएका छन् ।छनोट हुने अन्य खेलाडीमा आशिष भट्टराई, प्रशान्त महमत, अर्जुन कुमाल, दीपक बोहोरा, सुवास ऐर, निखिलकुमार सिंह, विशालकुमार पटेल र किस कार्की छन् ।

त्यसैगरी तिलकराज भण्डारी, रमेश कुर्मी, रोहन दुधराज विक, प्रशान्त सिंह र सुशान्त थापा पनि छनोटमा परेका छन् । वैकल्पिकतर्फ अभिशेक गौतम, पर्शुराम यादव, अरबाज अन्सारी र विवेक दर्शी रहेका छन् । नेपालले आफ्नो पहिलो खेल यही वैशाख ७ गते म्यान्मासँग खेल्दै प्रतियोगिताको उद्घाटन गर्नेछ । समूह ए’ मा रहेको नेपालको समूहमा आयोजक थाइल्याण्ड र मलेसिया छन् । त्यस्तै समूह ‘बी’ मा हङकङ, सिङ्गापुर, भुटान र चीन रहेका छन् । नेपाली टोली बिहीबार थाइल्याण्ड जानेछ । (रासस)

काठमाडौं । लियोनल मेस्सीको उत्कृष्ट प्रदर्शनसँगै बार्सिलोना च्याम्पियन्स लिग फुटबलको सेमिफाइनल प्रवेश गरेको छ । म्यानचेस्टर युनाइटेडलाई स्तब्ध पार्दै बार्सिलोना लिगको सेमिफाइनल प्रवेश गरेको हो ।

घरेलु मैदानमा मंगलबार राति भएको क्वाटरफाइनलको दोस्रो लेगमा इंग्लिस क्लब युनाइटेडलाई ३(० ले हराउँदै स्पेनिस क्लब बार्सिलोनाले समग्रमा ४(० को जितसहित अन्तिम चारमा स्थान बनाएको हो ।

पहिलो लेगमा बार्सिलोना १-० ले विजयी भएको थियो । घरेलु मैदानमा भएको दोस्रो लेगमा बार्सिलोनाका लागि लियोनल मेस्सीले १६ र २० औँ मिनेटमा गरि दुई गोल गरे ।यस्तै फिलिप कोन्टिन्होले ६१ औँ मिनेटमा गोल गरि टिमलाई जिताउन सहयोग गरे । युनाइटेडका एलेक्स सान्चेजले गोल गर्ने राम्रो मौका बनाएका थिए । तर बार्सिलोनाका गोलरक्षकले रोके ।

काठमाडौँ, ३ वैशाख : आइसिसी उन्नाइस वर्षमुनि (यु १९) एक दिवसीय विश्वकप क्रिकेटको एशिया छनोटअन्तर्गत आज भएको चौथो खेलमा नेपालले ओमनलाई पराजित गरेको छ ।मलेशियाको शिलानगोर ट्रफ क्लबको मैदानमा भएको खेलमा नेपालले ओमनलाई १५० रनको भारी अन्तरले पराजित गरेको हो । यस जितसँगै नेपालको विश्वकपमा छनोट हुने सम्भावना जीवितै रहेको छ । टस हारेर पहिले ब्याटिङ गरेको नेपालले ४३ दशमलव दुई ओभरमा सबै विकेट गुमाउँदै २२९ रनको योगफल तयार गयो । जवाफी ब्याटिङमा उत्रेको ओमन ४४ दशमलव एक ओभरमा सबै विकेट गुमाएर ७९ रनमा समेटियो ।ओमनका लागि अमनप्रित सिंह र जिल तन्नाले समान १३÷१३ रन जोड्नुबाहेक अन्य खेलाडीले दोहोरो अङ्क जोड्न सकेनन् । ओमनलाई सस्तैमा समेट्ने क्रममा नेपालका पवन सर्राफ एक्लैले तीन विकेट लिए ।त्यस्तै सूर्य तामाङ र प्रतिष जिसीले समान दुई÷दुई विकेट तथा कौशल मल्ल, भीम सार्की र कमल सिंहले एक÷एक विकेट लिए । त्यसअघि पहिले ब्याटिङ गरेको नेपालका लागि कप्तान रोहितकुमार पौडेलले सर्वाधिक ७५ रनको योगदान दिए ।

त्यसैगरी प्रतिष जिसीले ४१, भीम सार्कीले ३९, अभिषेक बस्नेतले १५ तथा रित गौतमले १० रन जोडे ।बलिङतर्फ ओमनका मुजाहिर राजा, सञ्जय रवीन्द्र, जिल तन्ना र अजम अलीले दुई÷दुई विकेट झारेका थिए । यसअघि तीन खेल खेलेको नेपालले दुई खेलमा जीत तथा एक खेलमा पराजय भोगेको थियो ।नेपालले पहिलो खेलमा सिङ्गापुरलाई २१७ रनको भारी अन्तरले पराजित गरेको थियो भने दोस्रो खेलमा युएइसँग एक रनले पराजित भएको थियो । त्यस्तै तेस्रो खेलमा नेपालले मलेशियालाई आठ विकेटले हराएको थियो । अब नेपालले छनोटको अन्तिम खेल यही चैत ५ गते बिहीबार कुवेतसँग खेल्नेछ । उक्त छनोट प्रतियोगिताको विजेता टोलीले दक्षिण अफ्रिकामा सन् २०२० मा हुने विश्वकपमा सहभागिता जनाउने छन् ।  (रासस)

काठमाडौँ । आइसिसी यू- ९ विश्वकप छनोटमा अहिले नेपाल र ओमानबीच जारी खेलमा नेपाललाई दोस्रो झड्का लागेको छ । दोस्रो विकेटका रुपमा रित गौतम आउट भएका छन् । रितको स्थानमा अहिले कप्तान रोहित पौडेल आएका छन् । यसअघि नेपालको पहिलो विकेटका रुपमा पवन श्रफ आउट भएका थिए । मलेसियाको क्वालालाम्पुरस्थित वायुमास ओभल मैदानमा सुरु भएको खेलमा नेपाल टस हारेर ब्याटिङमा उत्रिए लगत्तै पवन आउट हुन पुगेका हुन् । उनी दोस्रो ओभरमा आउट भएका हुन् । पवन आउट भए लगत्तै अभिषेक बस्नेत मैदान प्रवेश गरेका छन् । यो समाचार तयार पार्दासम्म नेपालले ओमन बिरुद्ध ९ ओभरको समाप्तिमा २ विकेटको क्षतिमा ३४ रन जोडेको छ ।

हिजो घरेलु टोली मलेसियालाई ८ विकेटको विशाल जित निकालेको नेपाल ३ खेलमा ४ अंक जोड्दै अंक तालिकाको दोस्रो स्थानमा उक्लिएको छ। त्यतिनै खेलबाट यूएई भने ६ अंकसहित शीर्ष स्थानमा रहेको छ। ६ टोली सम्मेलित प्रतियोगिताको शीर्षमा रहने टोली २०२० मा दक्षिण अफ्रिकामा हुने विश्वकपमा छनोट हुनेछन्। नेपाल र यूएई दुबैले अब २९२ खेल खेल्न बाँकी छ। आजको खेलमा कप्तान रोहित कुमार पौडेल, भिम सार्की, पवन सर्फ, सन्दिप जोरा, कमल सिँह ऐरी, रित गौतम, सुर्य तामाङ, प्रतिश जिसी, कुशल मल्ल, हरि बहादुर गौचन, अभिशेख बस्नेत खेल्दै छन् भने महमद असिफ, रसिद खान, सागर ढकाल आज रेष्टमा छन्।

धनगढी, २ वैशाख : नयाँ वर्ष २०७६ को अवसरमा यहाँ आयोजना गरिएको फुटसल प्रतियोगिताको उपाधि ‘पशुपति फारवेष्ट युवा क्लब धनगढी’ले जीतेको छ । ‘फल्याटल्याण्ड फुटसल धनगढी’ले आयोजना गरेको सो प्रतियोगिताको फाइनलमा पशुपतिले फोर्स मोटर्सलाई हराउँदै उपाधि हात पारेको हो । पशुपतिले फोर्सलाई ९–८ गोलले पराजित गरेको हो । उक्त प्रतियोगितामा १० टिमको सहभागिता रहेको आयोजक संस्थाले जनाएको छ ।  (रासस)

बाँके, २ वैशाख  : आठौँ राष्ट्रिय खेलकूद प्रतियोगिताअन्तर्गत क्रसकन्ट्री पुरुष साइक्लिङमा त्रिभुवन आर्मी च्याम्पियन बनेको छ । बैजनाथ गाउँपालिका– १ गाभरमा आज भएको सो प्रतियोगितामा आर्मीले एक स्वर्ण र एक रजत पदक जितेको छ । राष्ट्रिय साइक्लिङ खेलमा पुरुषतर्फ त्रिभुवन आर्मीका ओकेशराज बज्राचार्यले स्वर्ण जितेका हुन् । बज्राचार्यले ४ दशमलव ६ किलोमिटरको पाँच ल्याप एक घण्टा २५ मिनेट नौ सेकेन्डमा पूरा गरे । आर्मीकै हिमाल टमाटाले सो दूरी एक घण्टा २६ मिनेट ६ सेकेन्डमा पूरा गरी रजत पदक तथा गण्डकी प्रदेशका हिक्मत विकले एक घण्टा २६ मिनेट ४४ सेकेन्डमा पूरा गरी कास्य पदक जिते ।

क्रसकन्ट्री महिला साइक्लिङतर्फ ४ दशमलव ६ किलोमिटरको चार ल्यापमा प्रदेश नं ३ की लक्ष्मी मगरले स्वर्ण पदक जितिन् । उनले निर्धारित दूरी एक घण्टा २० मिनेट ५२ सेकण्डमा पूरा गरिन् । गण्डकी प्रदेशकी उषा खनालले सो दूरी एक घण्टा ३३ मिनेट ३८ सेकेण्डमा पूरा गरी रजत तथा प्रदेश ३ की निरजला ताम्राकारले एक घण्टा ३५ मिनेट ५६ सेकेण्डमा दूरी पार गरी कास्य पदक जितिन् । । बाँके साइक्लिङ सङ्घका अध्यक्ष राजकुमार विसीका अनुसार पुरुष साइक्लिङमा आर्मी र सशस्त्र प्रहरीको एपीएफ क्लब तथा ६ वटा प्रदेशका ३० खेलाडी सहभागी थिए । महिला साइक्लिङमा १२ खेलाडीले प्रतिष्पर्धा गरेका थिए ।  (रासस)